විදේශගතව සිටින පාතාලයේ ප්‍රබල මත්කුඩු ජාවාරම්කරුවෙක් වන ලොකු පැටීගේ ඥාතියෙකුටපසුගිය 09 වෙනිදා අලුයම 5.50ට පමණ ගාලු පාරේ අහුන්ගල්ල බෝධිය අසල ත්‍රීරෝද රථ ගාලේදී වෙඩි තබා ඝාතනය කිරීමට තැත් කළ වෙඩික්කරු සහ යතුරුපැදිකරු අහුන්ගල්ල පොලිසිය අත්අඩංගුවට ගෙන ඇත.

මෙම වෙඩි තැබීම කුඩු මධූෂා නැමැති මත්කුඩු ජාවාරම්කාරියගේ මෙහෙයැවීම මත සිදුව ඇති බව අනාවරණය වී තිබේ. මෙම මත්කුඩු ජාවාරම්කාරිය කොස්ගොඩ සුජීගේ මත්කුඩු ජාලයට සම්බන්ධ තැනැත්තියක් බව පොලිසිය සඳහන් කරයි.

වෙඩික්කරු ඌරගස්මංහන්දියේ පදිංචි යුධ හමුදාවේ හිටපු සෙබලෙකු බව පොලිසිය කියයි. ඔහු අවුරුදු 21ක් වයසැති අයෙකි. යතුරුපැදිකරු කරන්දෙණියේ පදිංචි අවුරුදු 27ක් වන පුද්ගලයකි.

මෙම සැකකරුවන් දෙදෙනා මත්කුඩු ළඟ තබාගැනීමක් සම්බන්ධයෙන් පසුගිය 20 වෙනිදා අත්අඩංගුවට ගෙන රදවාගෙන කළ විමර්ශනයේදී ඔවුන් අහුන්ගල්ලේ වෙඩි තැබීමට සම්බන්ධ අය බව අනාවරණය වී තිබේ.

වෙඩි ප්‍රහාරයට ලක්වූ පුද්ගලයා අහුංගල්ල ත්‍රීරෝද රථ සංගමයේ සභාපතිවරයා ද වේ.