කාගීල්ස් ෆුඩ්සිටි ශාඛාවකදී තරුණියකට අමානුෂික ලෙස එහි කාාර්ය මණ්ඩලය විසින් පහරදෙන ආකාරයේ වීඩියෝවක් සමාජ මාධ්‍ය ඔස්සේ එළියට ආවේ දින කිහිපයකට පෙරය.

නිෂ්චික ස්ථානයක් සඳහන් නොවූ එම වීඩියෝව හංවැල්ලේ පිහිටි ශාඛාවේ බව සඳහන් වූවත් මේ ගැන විශේෂ අවධානයක් යොමුකල පොලීසිය විමර්ශනයක්ද ආරම්භකරනු ලබන්නේ ඒ ගැන පැමිණිල්ලක්ද නොමැති පසුබිමක් තුලදීය.

එහිදී පැහැදිලි වන්නේ එම පහරදීම සිදුවන්නේ බොරැල්ල පොලිස් වසමට අයත් ඔබේසේකරපුර හංදියේ පිහිටි කොටාපාර කාගීල්ස් ශාඛාව තුළ බවය. ඒ අනුව බොරැල්ල පොලීසිය විසින් එම පහරදීමට සම්බන්ධ එම ශාඛාවේ සේවයේ නිරත තරුණියන් දෙනෙක් ඇතුළු පස් දෙනෙක් ඊයේ අත්අඩංගුවටගත්තේය. ඒ අය අතර කළමනාකාරිනියද සිටින බව සඳහන්ය.

මෙම පහරදීම සිදුව ඇතැයි පැවසෙන්නේ පසුගිය 18 වෙනිදාය. ඒ චොකලට් සොරකමක් මුල්කරගෙනය. මෙම පහරදීමට තවත් සේවකයින් දෙදෙනෙක් අත්අඩංගුවට ගැනීමට නියමිත බවද පොලිස් තොරතුරු සඳහන් කළේය. සමාජ මාධ්‍යවෙත මුදා හැරින ලද අදාල වීඩියෝව පවා අදාල ශාඛාවේ ආරක්ෂක කැමරාවේ සටහන්ව තිබුණු දර්ශනවලින් ලබාගත් එකක් බව උසස් පොලිස් නිලධාරියෙක් පැවසීය.