සූර්ය පැනල මගින් නිවාස සහ කර්මාන්තශාලා සඳහා විදුලිය උත්පාදනය කිරීමේ කටයුතුවලදී මතුවන නීතිමය බාධා ඉවත් කිරීම සඳහා විදුලිබල පනත සංශෝධන කිරීමට රජය තීරණය කර තිබේ.
නව සංශෝධනය සම්මත කර ගැනීම සඳහා ලබන මස 9 වනදා පාර්ලිමේන්තු විවාදයට ඉදිරිපත් කෙරෙන බව විදුලි බල හා බලශක්ති අමාත්‍ය කංචන විජේසේකර මහතා පවසයි.
2013 සම්මත කරන ලද විදුලිබල සංශෝධන පනතට අනුව කිසියම් පුරවැසියෙකු පෞද්ගලික ඉඩමක වුවද පුනර්ජනනීය බලශක්ති ව්‍යාපෘතියක් ආරම්භ කරන්නේ නම් එය ටෙන්ඩර කැඳවීමේ ක්‍රමවේදයක් යටතේ සිදුවිය යුතු ය.
ඒ අනුව සූර්ය පැනල විදුලිය ලබාගැනීමේදී මෙම නීතිමය තත්ත්වය බාධාවක් වන බැවින් එය ඉවත් කිරීමට අවශ්‍ය පියවර ගනිමින් සිටින බව විදුලි බල හා බලශක්ති අමාත්‍ය කාංචන විජේසේකර මහතා පවසා ඇත.
සූර්ය පැනල මගින් නිවාස සහ කර්මාන්තශාලා සඳහා විදුලිය උත්පාදනය කිරීමේ වැඩපිළිවෙළ ද ලබන ජුනි පළමුවනදා සිට ආරම්භ කිරීමට සැලසුම් කෙරේ.
කොළඹ ඊයේ (28) පැවති මාධ්‍ය හමුවකට එක්වෙමින් අමාත්‍යවරයා කියා සිටියේ ඒ සඳහා පාරිභෝගිකයන්ට අනුමැතිය ලබාදීම පහසු කිරීමට රජය සූදානම් වන බවයි.
පවතින තත්වය හමුවේ විදුලිය අරපිරිමැස්මෙන් භාවිතා කිරීමට කටයුතු කරන ලෙස විදුලි පාරිභෝගිකයන්ගෙන් ඉල්ලා සිටී.