යුක්රේන යුද පෙරමුණේ ඇතිව තිබෙන දරුණු සටන් අතර තුරදී රුසියානු හමුදා විසින් ජර්මනියේ නිෂ්පාදිත ලෙපර්ඩ් යුධ ටැංකි සහ එක්සත් ජනපදයේ නිෂ්පාදිත බ්‍රැඩ්ලි සන්නද්ධ රථ අත්පත් කරගැනීමට සමත්ව තිබේ.
රුසියානු ආරක්ෂක අමාතංශය විසින් අද දින මාධ්‍යට නිකුත් කළ වීඩියෝවකින් මෙලෙස බටහිර රටවල අවි අත්පත් කර බව අනාවරණය වි තිබේ. පසුගිය දින වල ඇතිව තිබූ දරුණු සටන් වලිදී රුසියාව විසින් යුක්රේන භාවිතා කළ ජර්මනියේ ලෙපර්ඩ් යුධ ටැංකි සහ එක්සත් ජනපදයේ බ්‍රැඩ්ලි සන්නද්ධ රථ සැලකිය යුතු සංඛ්‍යාවක් විනාශ කිරීමටද සමත්ව තිබිණි.
ඒ අනුව මෙලෙස නිකුත් කළ වීඩියෝවේ දක්නට ලැබෙන වාහන ලෙපර්ඩ් යුධ ටැංකි සහ බ්‍රැඩ්ලි සන්නද්ධ රථ බව තහවුරු කර ගැනීමට තමන්ට හැකියාව ලැබුණු බවද රොයිටර් පුවත් සේවයට සඳහන් කරයි. කෙසේ වෙතත් එම රථ කුමන ස්ථානයක පවතිනවාද යන්න තහවුරු කරගැනීමට නොහැකි වූ බවද එම පුවත් සේවය වැඩිදුරටත් සඳහන් කරයි.
යුක්රේන හමුදා ප්‍රතිප්‍රහාර එල්ල කිරීමට උත්සාහ කරන ප්‍රදේශවලින් එකක් වන දකුණු යුක්රේනයේ Zaporizhzhia පෙරමුණේ දී සන්නද්ධ වාහන සහ යුද ටැංකි අල්ලා ගත් බව රුසියානු ආරක්ෂක අමාත්‍යාංශය පවසයි. එම වීඩියෝ දර්ශන සමඟින් අමාත්‍යාංශය කෙටි ප්‍රකාශයක් නිකුත් කරමින් අල්ලා ගන්නා ලද හමුදා උපකරණ “අපේ කුසලාන” ලෙස හැඳින්වීය.
මීට මාස කීපයකට පෙර ජර්මනිය විසින් ලෙපර්ඩ් යුධ ටැංකි යුක්‍රේනයට ලබා දුන්නේ එමගින් රුසියානු හමුදා මැඩපැවැත්වීම ඉතා පහසුවනු ඇති බවට පවසමිනි. කෙසේවෙතත් මේවන විට එම රථ විශාල සංඛ්‍යාවක් විනාශ කිරීමට රුසියාව සමත්වීම බටහිර ලබාදුන් පොරෝන්දු සම්බන්ධයෙන් යම් ගැටලුවක්ද නිර්මාණය කරයි.