අද ඉන්ධන මිල සංශෝධනයක් සිදුකිරීමට නියමිතව තිබේ. ඒ සති 02 කට වරක් සිදුකරන ඉන්ධන මිල සූත්‍රයට අනුවයි.

සෑම මසකම 01 වනදා සහ 15 වනදා ඉන්ධන මිල සංශෝධනය කිරීමට තීරණය කළ බව පසුගියදා විදුලිබල හා බලශක්ති අමාත්‍යවරයා සඳහන් කළේ ය.

ඒ අනුව අමාත්‍යවරයා සඳහන් කළේ, අද දිනයේ සිදුවන ඉන්ධන මිල සංශෝධනයේදී අඩුවීමක් අපේක්ෂා කළ හැකි බවයි.

මේ අතර ජාතික ඉන්ධන අවසර පත්‍රය හෙවත් QR කේතයට අනුව ඉන්ධන බෙදාහැරීම සහ නව පාසල් බස් රථ සේවාව අද සිට ආරම්භ කර තිබේ.

මේ අනුව දිවයින පුරා ඉන්ධන බෙදා හැරීමේ කටයුතු අද (01) සිට QR ඉන්ධන අවසරපත්‍ර ක්‍රමවේදය යටතේ පමණක් සිදුවේ.

වාහන ලියාපදිංචි අංකයේ අවසන් ඉලක්කම මත පදනම් වූ අංක තහඩු ක්‍රමය, ටෝකන් ක්‍රමය සහ මෙතෙක් ක්‍රියාත්මක වූ අනෙකුත් ක්‍රමවේද අද දිනයේ සිට අවලංගු ය.

ඒ අනුව, අද සිට ඕනෑම වාහනයකට QR කේතය ඉන්ධන පිරවුම්හලට පෙන්වා ඉන්ධන ලබාගැනීමේ සතිපතා ඒ ඒ වාහන සඳහා වෙන් කර ඇති ඉන්ධන කෝටාව ලබාගැනීමේ හැකියාව පවති.

කොවිඩ් ව්‍යාප්තිය යළි ඉහළ යාම හේතුවෙන් ඉන්ධන පිරවුම්හල්වලට පැමිණීමේදී මුහුණු ආවරණ පැළඳීම අනිවාර්ය කර ඇත.

අද සිට ඉන්ධන බෙදාහැරීම පිළිබඳ වැඩිදුර විස්තර මෙතැනින් ලබාගත හැකිය.