නීති විරෝධි ලෙස නිෂ්පාදනය කරනු ලබන මත්පැන් බෝතල්කර රජයේ අනුමත මත්පැන් වර්ගයක ලේබලයකින් බෙදා හැරීමේ ජාවාරමක් යාපනය කොට්ඨාශ අපරාධ විමර්ශන ඒකකයේ නිලධාරීන් විසින් හෙළිකරගෙන තිබේ.

ඒ අනුව කොට්ඨාශ අපරාධ විමර්ශන ඒකකයේ නිලධාරීන් ඊයේ (11) යාපනය රෝහල පාරේ ලැගුම්හලක පවත්වාගෙන ගිය එම නීති විරෝධි මත්පැන් ස්කාගාරය වටලනු ලැබීය.

එහිදී රජයේ අනුමත මත්පැන් වර්ගයක ලේබලය ගසා බෙදා හැරීමට සූදානම්කර තිබුණු මිලි ලීටර් 750 ප්‍රමාණයේ මත්පැන් බෝතල් 42 ක් මිලි ලීටර් 180 ප්‍රමාණයේ මත්පැන් බෝතල් 26 ක් සොයාගෙන තිබේ. ඊට අමතරව බෝතල්වලට පිරවීමට සූදානම්කර තිබුණු මත්පැන් ලීටර් 3000 ක්ද සොයාගෙන ඇත. මත්පැන් බෝතල්වලට ඇලවීමට සූදානම්කර තිබුණු ලේබල් මෙන්ම මත්පැන් බෝතල් වලට මූඩිය මුද්‍රාව සහිතව යෙදීමට යොදා ගන්නා උපකරණයක්ද පොලීසිය සොයාගෙන තිබේ.

මෙම හොර ස්කාගාරය පවතවාගෙන යාම සම්බන්ධයෙන් සැකපිට යාපනය මල්කම් හී පදිංචිකාර 48 වියැති පුද්ගලයෙක් අත්අඩඩංගුවට ගෙන ඇත.

අලුත් අවුරුද්ද ඉලක්කර ගනිමින් මෙම මත්පැන් බෝතල් කිරීම්වල නිරතව සිට ඇතැයි පොලීසිය සැකකරයි.