මාතර වෙරළ උද්‍යානය යාබදව පිහිටා ඇති රන් දූපතට (පරෙවි දූපත) පිවිසීමට තිබූ කඩාවැටුණු පාලම වෙනුවට නව පාලමක් ඉදි කරන ලෙස ජනාධිපති ගෝඨාභය රාජපක්ෂ මහතා ඊයේ (04) පස්වරුවේ නියෝග කිරීමත් සමඟ ඉදිකිරීම් පිළිබඳ සොයා බැලීමට රාජ්‍ය සංවර්ධන සහ නිර්මාණ නීතිගත සංස්ථාවේ නිලධාරීන් අද (05) පෙරවරුවේ එම ස්ථානයට යාමට නියමිතය.
පාලමේ ඉදිකිරීම් මාස 06ක් ඇතුළත නිම කිරීමට අපේක්ෂා කරන බව මහාමාර්ග අමාත්‍යාංශයේ ලේකම්වරයා පවසයි.
ඊයේ පෙරවරුවේ එය කඩා වැටීමෙන් දූපතට පිවිසීමට නො හැකි තත්ත්වයක් උද්ගත ව ඇති බව පූජ්‍ය ඕමාරේ කස්සප හිමියන් විසින් ජනාධිපතිවරයාට දැනුම් දීමෙන් අනතුරුව ජනාධිපතිවරයා විසින් කඩිනමින් පාලමක් තනාදෙන ලෙස මහාමාර්ග අමාත්‍යාංශයේ ලේකම් ආර්.ඩබ්.ආර්. පේමසිරි මහතාට උපදෙස් දී තිබේ.
රන් දූපතට පිවිසීමට ඉදි කර තිබූ පාලම දීර්ඝ කාලයක සිට අබලන් ව පැවතිණ.
සියම් මහා නිකායෙහි රෝහණ පාර්ශ්වයේ උපෝසථාගාරය පිහිටා ඇති මෙම දූපත දෙස් විදෙස් සංචාරකයන්ගේ ආකර්ෂණය දිනාගත් ස්ථානයකි.