වැටුප් ගැටළුවක් මුල්කරගෙන ගුරු- විදුහල්පතිවරුන් විසින් ජනාධිපති ලේකම්කාර්යාලය ඉදිරිපිට අද පැවැති උද්ඝෝෂණයෙන් අනතුරුව ගුරුවරුන් 42 දෙදෙනක් මේ වන විට අත්අඩංගුවට ගෙන තිබේ.
පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති නීතීඥ අජිත් රෝහණ මහතා සදහන් කරන්නේ එම උද්ඝෝසණයට සම්බන්ධව සිටි පිරිස් කලහාකාරී ලෙස හැසිරෙමින් ප්‍රධාන මාර්ගය අවහිරකරමින් උද්ඝෝෂණයේ නිරතවීම සම්බන්ධයෙන් විශේෂ පොලිස් කණ්ඩායම් කිහිපයක් යොදා එම පිරිස් අත්අඩංගුවට ගැනීමට පියවර ගත් බවය.
එසේ අත්අඩංගුවට ගත් අය අතර ගුරුවරියන් 16 දෙනෙක්ද ගුරුවරුන් 26 දෙනෙක්ද ඒ අය ගමන්ගත් වාහන 10 ක්ද වන බව පොලිසිය සදහන් කරයි. මෙම පිරිස් අත්අඩංගුවට ගෙන ඇත්තේ උද්ඝෝෂය නිමවීමෙන් අනතුරුව ඔවුන් සිය නිවෙස් බලා ගමන් කරමින් සිටියදීය.
සංචරණ සීමා සහ නිරෝධායන නීති උල්ලංඝනය කිරීම, නීති විරෝධි රැස්වීම, මහා මාර්ග අවහිර කිරීම, අයුතු ජන රාශිය ඇතුළු චෝදනා රැසක් මේ අයට එරෙහිව එල්ලවන බව ද අජිත් රෝහණ මහතා කීය.