මාළිගාවත්ත ලක්සෙත සෙවන තට්ටු නිවාස සංකීර්ණයේදී පාතාලයට සම්බන්ධ පුද්ගලයෙකුගේ හිසට වෙඩි තබා තුවාල කළ පාතාලයට සම්බන්ධ අයෙක් කොටහේනේ අවන්හලකදී වෙඩි තැබීමට යොදා ගත් 0.38 වර්ගයේ ගිනි අවියද සමග පෙරේදා (01) රාත්‍රිෙය්දී විශේෂ කාර්ය බලකායේ පොලිස් කණ්ඩායමක් විසින් අත්අඩංගුවට ගෙන තිබේ.
කොළඹ නගරයේ කැළි කසල ඉවත් කිරීමේ කටයුතු වල නිරත පුද්ගලික සමාගමක සේවක‍යෙක් වන සැකකරු සූදානම්ව සිට ඇත්තේ මන්නාරමට පළායාමට බවද අනාවරණය වී ඇත. මාළිගාවත්ත මැල්වත්තේ පදිංචිකරුවෙක් වන සැකකරු විවහා වී සිටින්නේ මන්නාරමේ කාන්තාවක් සමග බවද අනාවරණය වී තිබේ.
මෙම පුද්ගලයා මාළිගාවත්තේ ක්‍රියාත්මක වූ මුස්ලිම් පාතාලයේ කල්ලි නායකයෙක් වන මාමා අස්මීගේ ගෝලයෙක් බවද අනාවරණය වී ඇත. සහෝදර සහෝදරියන් 06 දෙනෙක් ඔහුට සිටින අතර එක් සහෝදරයෙක් මේ වන විට සිටින්නේ රක්ෂිත බන්ධනාගාරයේය. ඒ වෙඩි තබා පුද්ගලයෙක් ඝාතනයට උත්සහ දැරීමකට සැකපිටය. ඔහු වෙඩි තබා ඝාතනය කරන්නට උත්සහා දරා ඇත්තේ ඉකුත් 29 වෙනිදා ලක්සෙත තට්ටු නිවාස සංකීර්ණයේදී වෙඩි ප්‍රහාරයට ලක්වූ පුද්ගලයාටමය. එම පුද්ගලයාට මෙයට වසරකට පෙර වෙඩි මාළිගාවත්තේදී වෙඩි තබා ඇති අතර වෙඩික්කරු සමග යතුරු පැදිය පදවා ඇත්තේ ඔහුගේ සහෝදරයා බව පොලීසිය සදහන් කරයි.
ලක්සෙත නිවාස සංකීර්ණයේදී වෙඩි ප්‍රහාරයට ලක්වූ පුද්ගලයා තමාට නිතරම පහරදෙන බවත් 29 වෙනිදාද තමාට පහරදුන් බවත් සැකකරු පොලිස් ප්‍රශ්න කිරීම් වලදී සදහන් කර තිබේ. දිගින් දිගටම තමාට ඔහු පහරදෙන බැවින් නිවසේ වහලයේ සගවා තිබුණු ගිනි අවිය රැගෙනගොස් නිවාස සංකීරණයේ 10 වැනි මහලේ නිවසක රැදී සිටි ඔහුට වෙඩි තැබූ බව ද සැකකරු සදහන් කර ඇත.
වෙඩි තැබීමෙන් පසු ගෙවී ගිය දින කිහිපය තුළ ඔහු සේවයේ නිරත ආයතනයේ නිල ඇදුමින් සැරසී කොළඹ නගරයේ තැන තැන සැගවී සිට ඇති බවද පොලීසිය කියයි.
සැකකරුව රදවාගෙන වැඩිදුරබ විමර්ශන පවත්වන බව පොලීසිය කියයි.
