පුහුණු වාරයකින් පසු ආපසු එමින් සිටි අමෙරිකානු හමුදා හෙලිකොප්ටර් යානා දෙකක් මධ්‍යම ඇලස්කාවේ හීලි අසලදී අනතුරට ලක්වීමෙන් හමුදා නියමුවන් තිදෙනකු මියගිය බව එරට වාර්තා පවසයි. අනෙක් නියමුවා තුවාල ලබා තිබේ.
අනතුර වන අවස්ථාවේදී හෙලිකොප්ටර් දෙකෙහිම හමුදාවේ 4 දෙනකු සිට ඇති බව සඳහන් ය.
දෙදෙනකු අනතුර වූ ස්ථානයේදීම මියගොස් ඇති අතර අනෙක් නියමුවා රෝහල්ගත කිරීම සඳහා ගෙනයමින් සිටියදී මියගොස් තිබේ.
මෙලෙස ගැටී ඇත්තේ අමෙරිකානු හමුදාවට අයත් AH-64 Apache හෙලිකොප්ටර් යානා දෙකකි. සාමාන්‍යයෙන් AH-64 Apache හෙලිකොප්ටරයක දෙදෙනකු ගමන් කරන බව පැවසේ.
සිද්ධිය වූ ස්ථානයේ හමුදා වෛද්‍ය කණ්ඩායම් හදිසි ගලවාගැනීමේ කණ්ඩායම් මෙහෙයුමක් දියත් කර ඇති අතර මෙම අනතුර පිළිබඳ විමර්ශනය ද ආරම්භ කර ඇත.
විමර්ශන තොරතුරු ලැබුණු පසු වැඩිදුර තොරතුරු හෙළි කරන බව අමෙරිකානු යුද හමුදාව පවසයි.
මෙම හෙලිකොප්ටර් යානා 25 වන ගුවන් සේවා රෙජිමේන්තුවේ, ෆෝට් වේන්ව්රි හි පළමු ප්‍රහාරක ඔත්තු බැලීමේ බලඇණියට අයත් ඒවා විය.
කෙන්ටකි-ටෙනසි දේශසීමාව අසල සාමාන්‍ය පුහුණු මෙහෙයුමක් අතරතුර එක්සත් ජනපද හමුදාවේ බ්ලැක් හෝව්ක් හෙලිකොප්ටර් දෙකක් එකිනෙක ගැටීමෙන් සොල්දාදුවන් 9 දෙනෙකු මිය ගොස් මාසයකටත් අඩු කාලයකදී මෙම අනතුර සිදු විය.