නිසි තොරතුරු ලබා නොදී හම්බන්තොට වරායට ඇතුළු වූ විකිරණශීලී ද්‍රව්‍ය රැගත් නෞකාවක් වහාම වරායෙන් පිටතට රැගෙන යන ලෙස පරමාණුක බලශක්ති නියාමන අධිකාරිය අද (21) අදාල නෞකාවට දැනුම් දී තිබේ.
මෙම නෞකාව හම්බන්තොට වරායට ඇතුළුවී ඇත්තේ ඊයේ (20) රාත්‍රියේය.
නෙදර්ලන්තයේ රොටඩෑම් සිට චීනය බලා යාත්‍රා කරමින් තිබුණු මෙම නෞකාව හම්බන්තොට වරායට පැමිණ ඇත්තේ යැයි කියවෙන්නේ එහි හටගත් බව කියන යාන්ත්‍රික දෝෂයක් හේතුවෙනි.
නෞකාව හම්බන්තොට වරායට ඇතුළු වීමේදී නෞකාවේ විකිරණශීලී ද්‍රව්‍ය ඇතැයි වරාය බලධාරීන්ට නිසි පරිදි තොරතුරු ලබාදී නොමැති බව පරමාණුක බලශක්ති නියාමන අධිකාරියේ අධ්‍යක්ෂ ජනරාල් අනිල් රංජිත් මහතා පැවසී ය.
