වත්තල ඇලකන්දේ පිහිටි කායවර්ධන මධ්‍යස්ථානයක් ආසන්නයේ දී සිදුවූ වෙඩි තැබීමකින් මත්කුඩු ඡාවාරමකට සම්බන්ධ පුද්ගලයෙක් මරුමුවට පත්ව ඇත.
කායවර්ධන මධ්‍යස්ථානයේ සිට ඔහු පිටතට පැමිණි අවස්ථාවේදී රැක සිටි පුද්ගලයෙක් ටී 56 අවියකින් ඔහුගේ හිසටම වෙඩි තබා ඇතැයි පොලිස් විමර්ශන වලින් පෙනී ගොස් තිබේ.
මට්ටක්කුලියේ අල්ලි වත්තේ පදිංචිකරුවෙක් මෙසේ ඝාතනය වී ඇත. ඔහු තදින්ම අයිස් නැමැති මත්ද්‍රව්‍ය භාවිතයට ඇබ්බැහි වී සිටියෙක් බවද පැවසේ.
ඝාතකයා පැමිණ ඇත්තේ යතුරු පැදියකින් බවට තොරතුරුද පොලීසියට ලැබී ඇත.
මෙම ඝාතනය හා පසුගිය දිනවල සිදුවූ ඝාතන අතර යම් සම්බන්ධයක් තිබෙන්නේදැයි සොයා බලන බව උසස් පොලිස් නිලධාරීයෙක් කීය.
ඝාතනයට ලක්වූ පුද්ගලයා නිපුන නැමැති අයෙකි. ඔහුගේ පියාද මත්කුඩු ඡාවාරමකට සම්බන්ධව සිටියෙකි. ඔහු සුදු වෑන් රථ කල්ලියේ පැහැර ගැනීමකට ලක්වූ අයෙක්
බවද එම නිලධාරියා වැඩිදුරටත් සඳහන් කළේය.
මෙම ඝාතනය මේ වන විට ඉන්දියාවට පළාගොස් සිටින වැල්ල සාරංග නැමැති මත්කුඩු ඡාවාරම්කරුගේ කොන්ත්‍රාත්තුවකට අනුව ඔහුගේ ගෝලයින් විසින් කර ඇති බවට පොලීසිය විශ්වාස කරයි.