මහජන ආරක්ෂක ලේකම් සහ පොලිස්පතිවරයා සිය බලය අභිබවා සිදුකර ඇති පොලිස් නිලධාරීන්ගේ ස්ථාන මාරු සම්බන්ධයෙන් ලබන 07 වෙනිදා රැස්වන රාජ්‍ය සේවා කොමිෂම විශේෂ අවධානයටකට යොමු කිරීමට නියමිතව ඇත.
සේවා අවශ්‍යතා මතයැයි සඳහන් කරමින් ජ්‍යෙෂ්ඨ නියෝජ්‍ය පොලිස්පතිවරු තිදෙනෙක්ට ස්ථාන මාරු කිරීම සහ දේශපාලන බලපෑම් මත පොලිස් ස්ථානාධිපතිවරු 182 දෙනෙක් පත්කිරීම යන කරුණු දෙක කෙරෙහි එහිදී විශේෂ අවධානයකට යොමුවනු ඇතැයි රාජ්‍ය සේවා කොමිසමේ තොරතුරු අනාවරණය කළේය.
ඒ සම්බන්ධයෙන් පොලිස්පතිවරයාගෙන් සහ මහජන ආරක්ෂක අමාත්‍යාංශයේ ලේකම්වරයාගෙන් වාර්තා කැදවා ඇති බවත් එම වාර්තතා මෙදින සමාලෝචනය කිරීමට නියමිතව ඇති බවත් එම තොරතුරු සඳහන් කළේය.
ජ්‍යෙෂ්ඨ නියෝජ්‍ය පොලිස්පතිවරුන් වන අජිත් රෝහණ, රජිත ශ්‍රී දමින්ද සහ කමල් සිල්වා යන නිලධාරීන් තිදෙනා කොමිෂමටත් නොදන්වා හදිසියේම ස්ථාන මාරු කිරීමට තරම් ඇතිවූ සේවා අවශ්‍යතාවය කුමක්දැයි මෙහිදී විශේෂ අවධානයට යොමු වනු ඇත.
පොලිස් ස්ථානාධිපතිවරු පත්කිරීම සහ නිලධාරීන්ට ස්ථාන මාරුවීම් ලබාදීමේ බලය ඇත්තේ රාජ්‍ය සේවා කොමිෂමටය. පරිපාලනම පහසුව සඳහා එම බලතලවලින් කොටසක් පොලිස්පතිවරයාට සහ මහජන ආරක්ෂක ලේකම්වරයාට පවරා තිබේ.
ජ්‍යෙෂ්ඨ නියෝජ්‍ය පොලිස්පතිවරු තිදෙනාගේ ස්ථාන මාරුවීම් සහ පොලිස් ස්ථානාධිපතිවරු පත්කිරීම් සම්බන්දයෙන් මහජන ආරක්ෂක අමාත්‍යාංශයේ ලේකම්වරයා සහ පොලිස්පතිවරයා සිය බලය අභිබවා කටයුතු කර ඇති බවයි කොමිෂමේ නිරීක්ෂණය වී ඇත්තේ.
ඒ අනුව ලබන 07 වෙනිදා කොමිෂන් සභාව විසින් එම ස්ථාන මාරුවීම් සහ ස්ථානාධිපතිවරු පත්කිරීම් සම්බන්ධයෙන් තීරණයක්ද ගැනීමටද නියමිතය.