මෙරට වසා දැමුණු පාසල් 850 කට අධික ප්‍රමාණයක් පවතින්නේ යැයි ලේඛනගතව ඇති බව අධ්‍යාපන අමාත්‍ය දිනේෂ් ගුණවර්ධන මහතා පවසා තිබේ.
ඒවා ප්‍රයෝජනයට ගතයුතු බවද ඊට හැකියාව පවතින බවද අමාත්‍යවරයා සඳහන් කර ඇත්තේ පසුගියදා (09) පාර්ලිමේන්තු සංකීර්ණයේදී රැස් වූ අධ්‍යාපන උපදේශක කාරක සභාවේදී ය.
5 ශ්‍රේණියේ ශිෂ්‍යත්ව විභාගයේ කඩඉම් ලකුණක් ප්‍රසිද්ධ කිරීම සිදු නොකරන ලෙසට මන්ත්‍රීවරයෙකු ඉදිරිපත් කර තිබූ යෝජනාවක් ද එහිදී ප්‍රතික්ෂේප වී තිබේ.
මෙම කඩඉම් ලකුණු ලබා දීමෙන්, විශේෂයෙන් දෙමව්පියන්ට තම දරුවාට අවශ්‍ය පාසලක් තෝරා ගැනීම සඳහා අවස්ථාව සැලසෙන බව, කාරක සභාවේ බහුතරය අදහස් පළ කර ඇත.
දැනට 5 ශිෂ්‍යත්ව විභාගයට පෙනී සිට ප්‍රතිඵල අපේක්ෂාවෙන් සිටින දරුවන්ගේ සහ දෙමාපියන්ගේ බලාපොරොත්තු කඩ නොකරන ලෙස මෙහිදි මන්ත්‍රීවරුන් විසින්, අධ්‍යාපන අමාත්‍යවරයා වෙත කරුණු ඉදිරිපත් කර තිබේ.
පාසල්වල ගොඩනැගිලි ප්‍රයෝජනයට ගැනීම සීමා සහිතව කෙරෙන බැවින් පස්වරුවේද ඒවා ප්‍රයෝජනයට ගැනීමේ වැඩපිළිවෙළක් සකසන ලෙස මෙහිදී මන්ත්‍රීවරයකු අදහස් පළ කර ඇත.
අධ්‍යාපන අමාත්‍ය දිනේෂ් ගුණවර්ධන මහතා ඊට එකඟතාවය පළ කර ඇත.
