රට තුළ ඉන්ධන සැපයීම සම්බන්ධ ගැටලු මේ සෙනසුරාදා වන විට නිරාකරණය කර ලබන සඳුදා සිට යථාතත්ත්වයට පත්කරන බව බලශක්ති අමාත්‍යාංශයේ ලේකම් කේ.ඩී.ආර්. ඔල්ගා මහත්මිය පවසයි.
අමාත්‍යාංශ ලේකම්වරියා මේ අදහස් පළ කළේ ‘රට ශක්තිමත් කිරීමට බලශක්තිය’ යන තේමාව යටතේ ජනාධිපති මාධ්‍ය කේන්ද්‍රය විසින් අද (10) පෙරවරුවේ සංවිධාන කළ මාධ්‍ය හමුවකදීය.
ජනාධිපති මාධ්‍ය ප්‍රකාශක කිංස්ලි රත්නායක මහතා විසින් මෙම මාධ්‍ය හමුව මෙහෙයවන ලද අතර ලංකා ඛනිජ තෙල් නීතිගත සංස්ථාවේ සභාපති සුමිත් විජේසිංහ මහතා ද සහභාගී විය.
ඩීසල් රැගත් නෞකාවක් මේ වන විටත් කොළඹ වරායට පැමිණ ඇති අතර මේ මාසයේ නැව්ගතකිරීම් 4කින් ඩීසල් මෙට්‍රික් ටොන් 172,000ක් මෙරටට ලැබෙනු ඇතැයි අපේක්ෂා කරන බව අමාත්‍යාංශ ලේකම් ඔල්ගා පැවසීය.
බලාගාර සඳහා අවශ්‍ය බොරතෙල් නැව්ගත කිරීම් කිහිපයක් ද (මෙට්‍රික් ටොන් 30,000) ලැබී ඇති බවත් එමඟින් බටහිර වෙරළ තීරයේ බලාගාරය වැනි බලාගාර පූර්ණ ධාරිතාවයෙන් ක්‍රියාත්මක වීමට හැකි වන බවත් ඇය පෙන්වා දුන්නාය.