බසයක ගමන් කරමින් සිටියදී අපස්මාරය රෝගය වැළඳුණු වයස්ගත පුද්ගලයකු හබරණ ප්‍රදේශයේ දී මහමඟ දමා ගිය පුවතක් වාර්තා වේ.
බස් රථ රියදුරු සහ කොන්දොස්තරවරයා විසින් මෙම පුද්ගලයා දමාගොස් ඇත්තේ නිරන්තරයෙන් අලින් මාරුවන ප්‍රදේශයක දී ය.
පොළොන්නරුව සිට එම මාර්ගයේ විරුද්ධ දෙසට මෝටර් රථයකින් ගමන් කරමින් සිටි තරුණයකු මොහු මහමඟ ඉතා අනතුරුදායක ලෙස වැටී සිටිනු දැක සිය වාහනය යළි හරවා ගොස් පරීක්ෂා කර බලා තිබේ.
එහිදි රෝගී වී වැටී සිටි පුද්ගලයා ආසන්නතම නගරයට ගෙනගොස් යථාතත්වයට පත්වූ පසු ආහාරපාන දී බසයක නංවා යවා තිබේ.
හදිසි රෝගී තත්ත්වයකින් අසරණ වූ අවස්ථාවක, අලි හුවමාරු වන ප්‍රදේශයක යම් වේලාවක් ගත වන තුරුත් සිහි එළඹගත නොහැකි රෝගියකු මෙලෙස මාරක දෙකක් අතර අන්තරාදායක ලෙස මහමඟ දමාගිය අමානුෂික මිනිස්සුන් අතර, තමා යන ගමන නවතා ඔහුට ඇප උපස්ථාන කොට ප්‍රවේසම් සහගතව යාමට අවස්ථාව සැලසූ සත්කාරය කර තිබුණේ සුරේෂ් ඒකනායක මහතා ය.
නොමිනිසුන් අතර මිනිසකු වූ ඔහුට අපගේ උපහාරය!
