මිනිස් ජීවිතයට විමුක්තිය ගෙන ආ අති උතුම් ජේසුස් ක්‍රිස්තුස් වහන්සේගේ මරණයෙන් උට්ඨානයවීම සිහි ගැන්වෙන පාස්කු ඉරිදා දිනය අදට (04) යෙදී තිබේ.
දිවයින පුරා දේවාස්ථානවල ඊයේ (03) රාත්‍රීයේ ද දේව මෙහෙයන් පැවති අතර අද සියලු දේවස්ථාන කේන්ද්‍ර කරගනිමින් විශේෂ දේව මෙහෙයන් පැවැත්වේ.
ජේසුස් ක්‍රිස්තුස් වහන්සේගේ දුක්විඳීම, මරණය සහ උත්ථානය සිහි කරමින් කිතුණු ජනතාව අද පාස්කු ඉරුදින විශේෂ දේව මෙහෙයන් පවත්වයි.
දින 40ක චතාරික සමය ගෙවන කිතුණු බැතිමත්හු උපවාසයේ නිරත වෙමින් සහ ආගමික වතාවත්වල නිරත වෙමින් අද දිනයේ එම මංගල්‍යයට සහභාගී වෙති.
මීට දෙවසරකට පෙර අන්තවාදී පිරිසක් විසින් පාස්කු ඉරිදා දිනයේදී මෙරට දේවස්ථාන කිහිපයකට හා හෝටල් කිහිපයකට එල්ල කළ මරාගෙන මැරෙන බෝම්බ ප්‍රහාරවලින් මියගිය පුද්ගලයින්, වින්දිතයන් සිහිපත් කිරීමද එහිදී සිදුවේ.
මේ අතර පාස්කු ඉරිදා දිනය වන අද දේවාස්ථානවල ආරක්ෂාව තහවුරු කිරීම සඳහා 12,500 කට අධික ත්‍රිවිධ හමුදා සහ පොලිස් සාමාජිකයින් පිරිසක් රාජකාරී කටයුතුවලට යොදවා සිටී .
