රාගම වෛද්‍ය පීඨයේ ශිෂ්‍ය නේවාසිකාගාරයට කඩා වැදී වෛද්‍ය සිසුන්ට පහරදීමට පැමිණි මැර පිරිස පැමිණි පොල් සංවර්ධන මණ්ඩලයට අයත් මෝටර් රථයක් පොලිස් භාරයට ගෙන තිබේ.
පොල් සංවර්ධන මණ්ඩලයේ රියදුරෙක්ද එම වාහනය සමඟ අත්අඩංගුවට ගෙන ඇතැයි කැලණිය කොට්ඨාශයභාර ජ්‍යෙෂ්ඨ පොලිස් අධිකාරී රොහාන් ඩයස් මහතා සඳහන් කළේය.
අද අළුයම් කාලයේදී මෙම පහරදීම සිදුවී ඇති අතර එම පහරදීමෙන් වෛද්‍ය පීඨයේ සිව්වැනි වසරේ සිසුන් 03 දෙනෙක් සහ පහරදීමට පැමිණි කණ්ඩායමේ සිටි තෙවැනි වසරේ සිසුවෙක් තුවාල ලබා ඇතැයි පොලීසිය කියයි.
පහරදීමට පැමිණී කණ්ඩායමේ සිටින තුවාල ලැබූ සිසුවා මීගමුව රෝහලේත් සෙසු වෛද්‍ය සිසුන් රාගම රෝහලේත් ප්‍රතිකාර ලබන බව ජ්‍යෙෂ්ඨ පොලිස් අධිකාරී රොහාන් ඩයස් මහතා කීය.
මෙම ගැටුමට මුල නවක වදයක් බවට පෙනී යන බව ද රොහාන් ඩයස් මහතා සඳහන් කළේය.
පිටස්තර කණ්ඩායමක් රැගෙන පැමිණි වෛද්‍ය සිසුවාට ඊයේ දින කිසියම් පිරිසක් පහරදී ඇති බව පවසන බවත් ඊට ප්‍රතිචාරයක් ලෙස මෙම ප්‍රහාරය එල්ලකල බව ඔහු සදහන් කරන බවත් පොලීසිය කියයි.
පිටස්තර කණ්ඩායම රැගෙන පැමිණි වෛද්‍ය සිසුවා රාජ්‍ය අමාත්‍යවරයෙකුගේ පුත්‍රයෙකුගෙ පාසල් මිතුරෙක් බවත් එම මිත්‍රකමට පොල් සංවරධන මණ්ඩලයේ රියදුරු ඇතුළු කණ්ඩායමක් රැගෙන පැමිණ මෙම ප්‍රහාරය එල්ලකර ඇති බවත් පොලිස් විමර්ශන වලින් පෙනී ගොස් තිබේ.
වෛද්‍ය සිසුවා අදාල රාජ්‍ය ඇමතිවරයාගේ පුතා සමඟ යම් ව්‍යාපාරයක් පවත්වාගෙන යන බවද අනාවරණය වී ඇත.
මෙම පහරදීමට රාජ්‍ය ඇමතිවරයාගේ අනුදැනුමක් හෝ සම්බන්ධයක් ඇතැයි පෙනී නොයන බව පොලීසිය කියයි. පිටස්තර කණ්ඩායම රැගෙන පැමිණි වෛද්‍ය සිසුවාගේ මව් පියන්ද වෛද්‍යවරුන් බව පොලීසිය සදහන් කරයි.
මෙම පහරදීමට සම්බන්ධ පිටස්තර පුද්ගලයින් සිව් දෙනෙක් අත්අඩංගුවට ගැනීමට නියමිත බවත් ඔවුන් අද දවස තුළ පොලීසියට භාරවනු ඇතැයි පොලීසිය විශ්වාස කරයි.