ශ්‍රී ලංකාවේ පසුගියදා පැනවූ හදිසි අවස්ථා රෙගුලාසි මගින් සිවිල් කටයුතුවලදී හමුදාවේ කාර්යභාරය තවදුරටත් පුළුල් වියහැකි බැවින් තම කාර්යාලය මේ පිළිබඳ සමීපව නිරීක්ෂණය කරන බව ජගත් මානව හිමිකම් කවුන්සිලයේ මහකොමසාරිස් මිචෙල් බැචලේ පවසයි.
මෙරට දැඩි ආර්ථික අවපාතය මධ්‍යයේ ආහාර සුරක්‍ෂිතතාවය සහ මිල පාලනය සහතික කිරීමේ අරමුණින් අගෝස්තු 30 වන දින ශ්‍රී ලංකාව මෙම පියවර ගෙන ඇති බව ද ඇය කියාසිටියේ ස්විස්ටර්ලන්තයේ ජිනීවාහිදී අද ආරම්භ වූ 48 වැනි මානව හිමිකම් සැසිවාරයේදී ශ්‍රී ලංකාව පිළිබඳ යාවත්කාලීන කරන ලද සිය වාර්ෂික වාර්තාව ප්‍රකාශයට පත්කරමිනි.
2019 පාස්කු ඉරිදා බෝම්බ ප්‍රහාරයෙන් විපතට පත්වූවන් සහ ආගමික නායකයින් දිගින් දිගටම සත්‍යය සහ යුක්තිය ඉල්ලා සිටීම සහ එම ප්‍රහාරයන්ට ඉඩදුන් තත්වයන් පිළිබඳ සම්පූර්ණ වාර්තාවක් ලබාදීම ගැන ද සඳහන් කර තිබේ.
“ජනාධිපතිවරයා මෑතකදී සිවිල් සමාජ නායකයින් හමුවීම ගැන මම උනන්දුවෙන් සටහන් කරන අතර, පුළුල් සංවාදයක් සහ ශ්‍රී ලංකාවේ සිවිල් අවකාශය විවෘත කිරීමට පියවර ගැනීමට මම උනන්දු කරමි.”
එමෙන්ම 2011 දී දේශපාලනඥයෙකු ඝාතනය කිරීමේ වරදට වරදකරු වූ හිටපු පාර්ලිමේන්තු මන්ත්‍රී දුමින්ද සිල්වාට මෑතකදී ජනපති සමාව දීම, නීතිය හා නීතිය පිළිබඳ විශ්වාසය බිඳ වැටීමේ අවදානම ද ඇති කරන බව ඇය කියාසිටියාය.
“නීතිඥ හිජාස් හිස්බුල්ලා විශ්වාස කටයුතු සාක්ෂි නොමැතිව මාස 16 ක් නීතිය යටතේ රඳවා ඇත. එසේම, 2020 මැයි සිට ගුරුවරයෙකු හා කවියෙකු වන අහ්නාෆ් ජසීම් කිසිදු චෝදනාවක් නොමැතිව රඳවා තබාගෙන සිටින අතර, ත්‍රස්තවාදය වැළැක්වීමේ පනත භාවිතා කිරීම වහාම අත්හිටුවන ලෙසත්, එහි සවිස්තරාත්මක සමාලෝචනය හෝ අවලංගු කිරීම සඳහා පැහැදිලි කාල නියමයක් සකස් කරන ලෙසත් මම ඉල්ලා සිටිමි.” යැයි ද ඇය වැඩිදුරටත් ඉල්ලා සිටියාය.