අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ අංශයේ නිලධාරීන් විසින් අත්අඩංගුවට ගෙන රත්නපුර පොලිසියට භාරදුන් පාතාලයේ අපරාධකරුවෙකු පොලිස් සිරමැදිරියෙන් පලායාමක් සම්බන්ධයෙන් රත්නපුර පොලිසියේ සැරයන්වරු දෙදෙනෙකුගේ වැඩ තහනම් කිරීමට රත්නපුර සහකාර පොලිස් අධිකාරීවරයා පෙරේදා (30) පියවර ගෙන තිබේ.
පානදුරේ සිදුවූ වෙඩි කල ඝාතන දෙකකට සම්බන්ධ බව කියන මෙම අපරාධකරු ට රත්නපුර මහේස්ත්‍රාත් අධිකරණයෙන් වරෙන්තු දෙකක්ද නිකුත්කර තිබී ඇත.
රත්නපුර අංගම්මන පාරේ පදිංචි 35 හැවිරිදි මෙම අපරාධකරු අත්අඩංගුවට ගෙන ඇත්තේ ඔහු පදිංචිව සිටි නිවසේදී ය. ප්‍රශ්න කිරීමේදී හෙළිවී ඇත්තේ ඝාතන දෙකේ වෙඩික්කරු සමඟ යතුරුපැදිය පදවා ඇත්තේ සැකකරු බවය. රත්නපුර පොලිසියට පසුගිය 29 වෙනිදා සැකකරුව භාරදී ඇත්තේ රත්නපුර අධිකරණයෙන් ඔහුට එරෙහිය නිකුත්කර ඇති වරෙන්තුව හේතුවෙන් අධිකරණයට ඉදිරිපත් කිරීම සඳහාය.
මෙම අපරාධ සැකකරු මැලයාසියාවේ රැදී සිටින ප්‍රධාන මත්ද්‍රව්‍ය ජාවාරම්කරුවෙක් වන පානදුර නිලංග නැමැත්තාගේ ගෝලයෙක් බවටද තොරතුරු අපරාධ පරීක්ෂණ දෙපාර්තමේන්තුව විසින් හෙළිකරගෙන තිබිණි.
රත්නපුර පොලිසියේ නිලධාරීන් සැකකරුව භාර ගැනීමෙන් අනතුරුව සිර මැදිරිය තුළ රදවා තබා ඇත. එම සිරමැදියේ සැකකරුවන් සිව් දෙනෙක් සිට ඇති බව සඳහන්ය. පෙරේදා (30) උදෑසන එම සිර මැදිරියේ රැදී සිටි සැකකරුවන් වැසිකිලියට යාමට අවශ්‍ය බව සඳහන් කිරීම හේතුවෙන් රාජකාරියේ නිරතව සිටි පොලිස් නිලධාරීන් සිර මැදිරිය විවෘත කර වැසිකිලියට යාමට අවශ්‍ය බව සඳහන් කළ සැකකරුවන් සිරමැදිරියෙන් පිටත ඒ ආසන්නයේම ඇති වැසිකිලිය වෙත යොමුකර ඇත. සිර මැදිරියේ අගුල් විවෘතකර සැකකරුවන් පිටතට ගත්තද අගුල් නැවත දැමීමට පොලිස් නිලධාරියා අතින් අතපසු වී ඇත. සැකකරුවන් සිර මැදිරියෙන් පිටතට ගත් පොලිස් නිලධාරියාගේ අවධානය තිබී ඇත්තේ පිටතටගත් සැකකරුවන් වෙතය. ඒ අවස්ථාවෙන් ප්‍රයෝජනයගත් අගුල් විවෘතය තිබූ සිර මැදිරියේ සිටි අපරාධ සැකකරු පළාගොස් ඇති බව ඒ සම්බන්ධයෙන් කෙරන විමර්ශනයේදී පෙනී ගොස් තිබේ.
මෙම සැකකරු සිර මැදිරිය විවෘතකරගෙන සිර මැදිරියේ රදවා සිටි වෙනත් සැකකරුවෙකුට ලබාදීමට රැගෙනවිත් තිබුණු කමීසයක්ද හැද සාමාන්‍ය ගමනින් පොලිස් ස්ථානය ඇතුලත සිට පිටතට ගමන් කරන අයුරු ආරක්ෂක කැමරා වලද සටහන්ව තිබී ඇත. මෙසේ මෙම සැකකරු පළාගොස් ඇත්තේ උදෑසන 7.00ක් 7.05ත් අතර කාලය තුළදීය.
පොලිස් ස්ථානයෙන් පිටතට ගිය ඔහු පොලිස් ස්ථානය ආසන්නයේ ඇති සුපිරි වෙළඳ සැල අසලට ගමන් කිරීමෙන් පසු ඔහු ආගිය ස්ථානයක් සොයා ගැනීමට නොමැති බව උසස් පොලිස් නිලධාරියෙක් සඳහන් කළේය.