පුද්ගලයෙකු මරණයට පත්කර හත්දෙනෙකුට තුවාල ගෙන දෙමින් බොරැල්ල කනත්ත වට රවුමේ දී මෝටර් රථ 03ක් සහ යතුරුපැදි 06ක අද (28) උදෑසන ගැටුණු දොඹකරයේ රියදුරු එම අනතුර සිදුවන විට ගංජා භාවිතා කර සිට ඇතැයි අධිකරණ වෛද්‍ය පරීක්ෂණයේදී අනාවරණය වී තිබේ.

අනතුරින් පසු අත්අඩංගුවටගත් ඔහුව අධිකරණ වෛද්‍යවරයා හමුවට ඉදිරිපත්කර කළ පරීක්ෂාවේදී ඔහු ගංජා භාවිතා කර ඇති බව අනාවරණය වූ බව පොලිසිය සඳහන් කළේය.

තිරිංග පද්ධතිය අක්‍රිය වීමෙන් මෙම අනතුර සිදුව ඇතැයි සැකකරන බව පොලිස් මාධ්‍ය ප්‍රකාශක සහකාර පොලිස් අධිකාරී නීතිවේදි උදය කුමාර වුට්ලර් මහතා පැවසීය.

මෙම අනතුරින් පුද්ගලයින් 08 දෙනෙක් තුවාල ලබා කොළඹ ජාතික රෝහලට ඇතුලත් කර ඇත. තුවාලකරුවන්ගෙන් දෙදෙනෙක් කාන්තාවන්ය. සෙසු හය දෙනා පිරිමි පුද්ගලයන් බව පොලිසිය සඳහන් කළේය. ඒ අතරින් එක් අයෙක් ප්‍රතිකාර ලබමින් සිටියදී මියගිය බව පොලිස් මාධ්‍ය ප්‍රකාශක සහකාර පොලිස් අධිකාරී නීතිවේදී උදය කුමාර වුට්ලර් මහතා පැවසීය.

මියගොස් ඇත්තේ අතුරුගිරියේ පදිංචි අවුරුදු 62ක් වයසැති පුද්ගලයෙකි.