කාන්තාවක් පැහැරගෙන ගොස් සිරකර තබාගෙන ඇයව මරා දමන බවට තර්ජනය කරමින් රුපියල් ලක්ෂ 05ක කප්පමක් ලබාගැනීමට තැත්කල බව කියන දෙදෙනෙක් වව්නියාව පුවරසන්කුලම පොලිස් ස්ථානයේ නිලධාරීන් විසින් අත්අඩංගුවට ගෙන තිබේ.
එම කාන්තාව පුද්ගලයින් රට රැකියා සඳහා යවන බව සඳහන් කරමින් මුදල් වංචාවේ නිරතව සිටි අයෙක් බවද විමර්ශන වලින් හෙළිවී ඇත.
ඇයව පැහැරගෙන ගොස් කප්පම් ඉල්ලා ඇත්තේද ඇයට රැවටුණු පිරිසකගේ ඥාතීන් දෙදෙනෙක් බව පොලීසිය කියයි.
අත්අඩංගුවට ගත් සැකකරුවන් දෙදෙනා වව්නියාවේ සහ කිලිනොච්චියේ පදිංචි අවුරුදු 26 සහ 49 වයස්වල පසුවන්නන්ය.
මෙම කාන්තාව පැහැර ගැනීමට ලක්ව ඇත්තේ ඊයේ උදෑසන පුවරසකුලම් පොලිස් වසමේ වාරිකුට්ටූර් හීදීය.
ඇයව පැහැරගත් පුද්ගලයින් එම කාන්තාවගේ දියණියට දුරකතන ඇමතුම් දෙමින් සිය මව තමන් භාරයේ සිටින බව පවසමින් ඇයව නිදහස් කිරීමට රුපියල් ලක්ෂ 05ක කප්පමක් ඉල්ලා තර්ජනයකර ඇති බව පොලීසිය කියයි. එම මුදල ලබානොදුනහොත් ඇයට වෙඩි තබා මරා දමන බවටද පවසා තිබෙන බව දියණිය විසින් පොලීසියට පවසා ඇත.
දියණිය විසින් ඒ සම්බන්ධයෙන් කළ පැමිණිල්ලට අනුව පොලිස් නිලධාරීන් විසින් කළ මෙහෙයුමකට අනුව අපරාධකරුවන්ට මුදල් ලබාදෙන අවස්ථාවේදීම අත්අඩංගුවට ගෙන පැහැර ගැණුනු කාන්තාව මුදාගෙන තිබේ.
ප්‍රශ්න කිරීම් හමුවේ සැකකරුවන් පවසා ඇත්තේ එම කාන්තාව විසින් රට රැකියා සඳහා යවන බව සඳහන් කර සිය ඥාතීන්ගෙන් ලබාගත් මුදල් ගැනීම සඳහා ඇයව මෙසේ පැහැරගත් බවත් ඉල්ලා සිටියේ කප්පමක් නොව, රට රැකියා සඳහා යවන බව කියා ලබාගත් මුදල් බවත් පවසා තිබේ.
පොලීසිය සඳහන් කරනු ලැබුවේ එම මුදල් වංචාව සම්බන්ධයෙන්ද පරීක්ෂණයක් සිදුකරන බවය. එහෙත් එසේ බලහත්කාරයෙන් මුදල් ලබාගැනීමට පුද්ගලයින් පැහැර ගැනීමට හෝ මුදල් ඉල්ලා තර්ජනය කිරීමට නීතියෙන් ඉඩක් නොමැති බැවින් මෙම සැකකරුන් දෙදෙනා අධිකරණයට අද ඉදිරිපත්කරන බව උසස් පොලිස් නිලධාරියෙක් සඳහන් කළේය.