ගලිගමුව බෝයගම පිහිටි නිවසක් ඊයේ පරික්ෂාවට ලක්කල විශේෂ කාර්ය බලකාය පුරා විද්‍යාත්මක වටිනාකම් ඇති භාණ්ඩ කිහිපයක් සමඟ නිවෙස් හිමියා අත්අඩංගුවයට ගෙන තිබේ.

නාරම්බැද්ද සහ වවුනියාව විශේෂ කාර්ය බලකා කඳවුරුවල නිලධාරීන් විසින් ඒකාබද්ධව මෙම වැටලීම කර ඇත්තේ පුරා විද්‍යාත්මක වටිනාකම් ඇති ස්ථාන නීති විරෝධිව කැණීම්කර ගොඩගන්නා පුරා විද්‍යාත්මක වටිනාකම් ඇති භාණ්ඩ මෙම නිවසේ සඟවා ඇතැයි ලද තොරතුරකට අනුවය.

මෙම වැටලීමේදී ඉපැරණි අක්ෂර සහිත ගල්පතුරු 17ක් ගල්වලින් සකස් කළ කුප්පි 06 ක් එහිදී එම නිවසේ තිබී සොයාගෙන ඇත. ඊට අමතරව පොළොවේ ඇති ද්‍රව්‍ය හදුනා ගැනීමේ ස්කෑන් යන්ත්‍රයක් සහ බෝර 12 ගිනි අවියක්ද විශේෂ කාර්ය බලකා නිලධාරීන් විසින් එම නිවසේ තිබී සොයාගෙන ඇත.

අත්අඩංගුවට ගත් නිවෙස් හිමියා 59 වන වියේ පසුවන්නෙකි. වැඩිදුර විමර්ශනය සඳහා සැකකරු පිංදෙනිය පොලිස් ස්ථානයට භාරදී තිබේ.