ෆීජි රාජ්‍යයේ අභියාචනාධිකරණ වැඩබලන සභාපතිවරයා ලෙස ශ්‍රී ලාංකික විනිසුරු, ආචාර්ය ජයන්ත ද අල්මේදා ගුණරත්න මහතා අද දිනයේදී දිවුරුම් දී තිබේ.
ෆීජි හි ජනාධිපති, විශ්‍රාමික මේජර් ජෙනරාල් ජෝජි කොන්රෝට් හමුවේ දිවුරුම් දීම පැවැත්විණි.
වර්තමාන පත්වීම පිළිගැනීමට පෙර ආචාර්ය ගුණරත්න මහතා ශ්‍රී ලංකාවේ ජනාධිපති නීතිඥයෙකු ලෙස කටයුතු කරමින් සිටියේය.
ඔහු ප්‍රධාන වශයෙන් මහජන නීතිය, පරිපාලන හා ව්‍යවස්ථා නීතිය, ඉඩම් නීතිය, ගොඩනැගිලි නීතිය සහ සිවිල් ක්‍රියා පටිපාටිය යන ක්ෂේත්‍ර කිහිපයක පෙනී සිටියේය.
ඔහු කොළඹ විශ්ව විද්‍යාලය සහ ශ්‍රී ලංකා නීති විද්‍යාලය පිළිබඳ බාහිර කථිකාචාර්යවරයකු සහ විභාග පරීක්‍ෂකවරයකු ද විය.
ඔහු ශ්‍රී ලංකාවේ තොරතුරු දැන ගැනීමේ අයිතිය පිළිබඳ කොමිසම ඇතුළු දේශීය හා ජාත්‍යන්තර සංවිධාන කිහිපයක සම්පත්දායකයකු සහ උපදේශකවරයකු ද විය.