සූරියවැව නගරයේ පැවති වෙළද හා විනෝද සැණකෙළියක ආරක්ෂක රාජකාරි අවසන්ව සිය නිවස බලා යතුරුපැදියකින් ගමන් කරමින් සිටි උප පොලිස් පරීක්ෂවරයෙක් අද අළුයම අනතුරකට ලක්ව මිය ගොස් තිබේ.

උප පොලිස් පරීක්ෂකවරයා ගමන් ගත් ගතුරුපැදිය මාර්ගයෙන් ඉවතට පැන පෙරලීමෙන් මෙම අනතුර සිදුව ඇතැයි සූරියවැව පොලීසිය කියයි.

සූරියවැව – ඇඹිලිපිටිය මාර්ගයේදී මෙම අනතුර සිදුව ඇත. උප පොලිස් පරීක්ෂකවරයාට නින්ද යාමෙන් මෙම අනතුර සිදුවන්නට ඇතැයි සැකකෙරේ.

අළුයම 12.30ත් 1.00ත් අතර කාලය තුළ රාජකාරි නිමවා ඔහු ඇඹිලිපිටියේ පිහිටි සිය නිවස බලා ගමන් කර ඇති බවත් අළුයම් කාලයේදී එම අනතුර වූ ස්ථානය අවට නිවෙස්වල පදිංචිකරුවන්ට ශබ්දයක් ඇසී පරීක්ෂාකර බැලූවත් අඳුර නිසා යතුරුපැදිය මාර්ගයෙන් ඉවතට පැන පෙරලී ඇති බවක් දැක නොමැති බවත් පොලීසිය කියයි. එම අනතුර වූ ස්ථානයේ මාර්ග තරමක් උසින් පිහිටා ඇත. යතුරු පැදිය මාර්ගයෙන් ඉවතට පැන පෙරලී ඇත්තේ බෑවුමටය. මාර්ගයෙන් ඉවතට විසිවී තිබුණු යතුරුපැදිය හා බිම වැටී සිටි උප පොලිස් පරීක්ෂකවරයාව ගම්වැසියන් විසින් දැක ඇත්තේ උදෑසන එළිය වැටුණු පසුවය. ඒ වන විටත් පොලිස් නිලධාරියා මියගොස් සිට ඇත. 119 පොලිස් හදිසි ඇමතුම් අංශයට මේ ගැන ප්‍රදේශවාසියෙක් ලබාදුන් තොරතුරකට අනුව සූරියවැව පොලීසියේ නිලධාරීන් විසින් එම ස්ථානයට පැමිණ පරීක්ෂා කිරීමේදී මිය අනතුරට ලක්ව මියගොස් සිටින්නේ සහෝදර පොලිස් නිලධාරියෙක් බව හදුනාගෙන තිබේ.

එක්දරු පියෙක් වන එම පොලිස් නිලධාරියා 35 වන වියේ පසුවිය.