උතුරු කොරියාව (ඩීපීආර්කේ) සහ දකුණු කොරියාව අතර පවතින අන්තර් කොරියානු සියලුම සන්නිවේදන මාර්ග කපා හරින බව නිල කොරියානු මධ්‍යම පුවත් ඒජන්සිය නිල නිවේදනයක් කර තිබේ.
ඊයේ දහවල් 12.00 ට මෙලෙස උතුරු-දකුණු කොරියා අතර සන්නිවේදනය අත් හිටුවන ලදී.
උතුරු කොරියාව විසින් මේ බව පවසා තිබුණේ මෙසේය. “උතුරු-දකුණ ඒකාබද්ධ සම්බන්ධතා කාර්යාලය හරහා නඩත්තු කරන ලද උතුරේ සහ දකුණේ බලධාරීන් අතර සම්බන්ධතාව මුළුමනින්ම කපා දමා වසා දමනු ඇත. 12:00 (GMT 0300) සිට ඇරඹේ.” යැයි ජුනි 9 වන දින වාර්තාවේ සඳහන් වේ.
උතුරු හා දකුණේ හමුදා අතර නැගෙනහිර හා බටහිර මුහුදේ සන්නිවේදන මාර්ග, අන්තර් කොරියානු අත්හදා බැලීමේ සන්නිවේදන මාර්ගය සහ කම්කරු පක්ෂයේ මධ්‍යම කාරක සභාවේ කාර්යාල ගොඩනැගිල්ල අතර ඇති ඇමතුම් අංකය ද ඇතුළුව අනෙකුත් සන්නිවේදනයන් ද කපා හරිනු ඇත.
උතුරු කොරියානු සම්බන්ධතා කාර්යාලය වසා දමන බවට හෝ 2018 දී අත්සන් කරන ලද හමුදාමය සහයෝගීතා ගිවිසුමෙන් ඉවත් වන බවට එහි ඉහළ නිලධාරීන් මෑතකදී තර්ජනය කිරීමෙන් පසුව උතුරු කොරියාවේ පසු විපරම් ක්‍රියාමාර්ගයක්
මෙය තීරණය කරන්නට ඇතැයි පෙනෙන්නට තිබේ.
උතුරු කොරියානු නායක කිම් ජොන් උන් ගේ සහෝදරිය වන කිම් යෝ-ජොං පවසා තිබුණේ උතුරෙන් දකුණට පලා ආ කණ්ඩායම් විසින් තර්ජනය කරමින් උතුරට පත්‍රිකා යැවීම නතර නොකරන්නේ නම්, අන්තර් සම්බන්ධතා කාර්යාලය වසා දමන බවට හෝ උතුරේ දේශ සීමාවේ කොසොංහි දැන් වසා දමා ඇති ඒකාබද්ධ කාර්මික උද්‍යානයක් සම්පූර්ණයෙන්ම විනාශ කරන බවයි.