ඉන්දියාව සහ ශ්‍රී ලංකාව අතර මුහුදු මාර්ග ඔස්සේ සිදුවන ජාවාරම් මේ වන විටට ඉහළ ගොස් ඇති බව බුද්ධි අංශ සඳහන් කරයි.

මුල් කාලයේ හෙරොයින් තොග වශයෙන් මුහුදු මාර්ග ඔස්සේ මෙරටට රැගෙන ආවේ ඉන්දියාවේ සිට වූවත් දැන් මත්ද්‍රව්‍යක් ලෙස වැඩි වශයෙන් ඉන්දියාවේ සිට මුහුදු මාර්ග ඔස්සේ මෙරටට රැගෙන එන්නේ කේරල ගංජාය. ඒ හැරුණු කොට වැඩි වශයෙන් ඉන්දියාවේ සිටට මෙරටට මුහුදු මාර්ග ඔස්සේ රැගෙන එන්නේ ඖෂධ වර්ගයන්ය. ඒ අතර වැඩියෙන්ම මෙරටට රැගෙන එන ඖෂධ කරලක්ද වේ. එය වේදනා නාශයකි. වෛද්‍ය නිර්දේශ මත භාවිතා කිරීම මෙන්ම ඔසුහල්වලට අලෙවි කිරීමටද තහනම් කර ඇති එම කරල මත්කුඩු ලෝලීන් මෙන්ම තරුණ ප්‍රජාව දැන් වැඩි වශයෙන් මත්වෙන්න භාවිතා කරති. මෑතකදී කොළඹ මරදානේ පිහිටි බාලිකා පාසලක සිසුවිය 05 දෙනෙ‍ක් පවා භාවිතාකර තිබුණේ මෙම කරල් වර්ගයයි. විශාල වශයෙන් මෙම ඖෂධ කරල් ධීවර බෝට්ටුවල සඟවා මෙරට ගෙන එන අතර ආරක්ෂක අංශ වල සාමාජිකයන්ද මේ ජාවාරම පිටුපස සිටින බව සඳහන්ය. බෙල්ලන්විල පිහිටි කොහුවල පොලිසියේ නිලධාරියෙකුගේ නිවසක ගබඩාකර තිබියදී පසුගිය සතියේ සොයාගත්තේද මෙවැනි මත්කරල් ලක්ෂ 13කට අධික ප්‍රමාණයකි.

මේ හැරුණු කොට බීඩි කොලද මහා පරිමාණයෙන් ඉන්දියාවේ සිට මෙරටට රැගෙන ඒමේ ජාවාරමක් ක්‍රියාක්මකය. ඒත් එක්කම කහ සහ ඉගුරුද ඉන්දියාවේ සිට බෝට්ටු මගින් රැගෙන එති.

මෙසේ ඉන්දියාවේ සිට රැගෙන ආ වියලි ඉගුරු කිලෝ 35ක්, වියල් කහ කිලෝ 35ක් සහ ඖෂධ තොගයක් පැවූ කැබ් රථයක්ද ඊයේ (01) නොරොච්චෝලේ ඉලන්තඩිය වෙරළ ආසන්නයේදී කල්පිටිය පොලිසියේ නිලධාරීන් විසින් සොයාගෙන තිබිණි. වැටලීම සිදුවන විට ලොරිය අතහැර සැකකරුවන් සිටියේ පළාගොසිනි.