නිවසකට කඩාවැදී මෝටර් රථයක් බලහත්කරයෙන් රැගෙන යාමට උත්සහ කළ රාජ්‍ය බුද්ධි සේවයේ ප්‍රධාන පොලිස් පරීක්ෂකවරයෙක් ඇතුළු තිදෙනෙක් කිරිබත්ගොඩ පොලිසිය විසින් ඊයේ අත්අඩංගුවට ගෙන ඇත
වත්තල හුණුපිටිය වේවැල්දූව පාරේ පිහිටි නිවසකට මෙසේ මෙම නිලධාරියා ඇතුළු සිව් දෙනෙකුගෙන් සමන් විත කණ්ඩායමක් ඊයේ පෙරවරුවේ පැමිණ ඇත්තේ පොලිස් විමර්ශනයකට පැමිණි කණ්ඩායමක් ලෙසිණි.
ඒ පැමිණි ඔවුන් නිවස පිහිටි ඉඩමේ නවතා තිබුණු මෝටර් රථයක් අසලට ගොස් එම රථය කාගේදැයි නිවෙස් හිමියාගෙන් විමසා ඇත. එම අවස්ථාවේදී නිවෙස් හිමියා පවසා ඇත්තේ මුදල් ගණුදෙනුවක් මත එම මෝටර් රථය පුද්ගලයෙක් විසින් තබා ගිය බවය.
එහිදී රාජ්‍ය බුද්ධි සේවයේ ප්‍රධාන පොලිස් පරීීක්ෂකවරයා පවසා ඇත්තේ එම මෝටර් රථය කුළි පදනම මත ලබාගත් එකක් බවත් එය එම පුද්ගලයාට අයිති නොවන බවත්ය. ඒ අනුව මෝටර් රථය කිරිබත්ගොඩ පොලිස් ස්ථානයට රැගෙන යායුතු බව පවසා තිබේ. එහිදී ප්‍රධාන පොලිස් පරීක්ෂකවරයා නිවෙස් හිමියාගෙන් මෝටර් රථයේ යතුරද ඉල්ලාගෙන ඇත.
මද වෙලාවක් යන විට මේ අයගේ හැසිරීම ගැන සැකයක් ඇතිවීම හේතුවෙන් නිවෙස් හිමියා මෝටර් රථය රැගෙන නොයන ලෙස පවසමින් යතුරු ඉල්ලා ඇත. එහිදී පොලිස් නිලධාරියා මෝටර්් රථය රැගෙන පළාගොස් තිබේ.
මෙම අවස්ථාවේදී නිවෙස් හිමියා අසල්වාසීන්ගේද සහය ඇතිව සෙසු තිදෙනාගෙන් දෙදෙනෙක් අල්ලා ගස්බැද ඇත. එක් අයෙක් පළාගොස් තිබේ. ඒ ඔවුන් පැමිණි වෑන් රථයද අතහැර දමාය.
මේ ගැන නිවෙස් හිමියා කිරිබත්ගොඩ පොලිසියට දැනුම්දීමෙන් පසු පොලිස් නිලධාරීන් පැමිණ ගස්බැද සිටි සැකකරුවන් දෙදෙනා අත්අඩංගුවට ගෙන තිබේ. ඔවුන්ගේ තොරතුරු මත රාජ්‍ය බුද්ධි සේවයේ ප්‍රධාන පොලිස් පරීක්ෂකවරයා අත්අඩංගුවට ගෙන ඇත.
මෙම බුද්ධි නිලධාරියා රාජකාරිමය නොවන පුද්ගලික කටයුත්තකට පොලිස් වෙසින් සම්බන්ධ වී ඇති බව විමර්ශනයේදී අනාවරණය වී තිබේ.