දේශබන්දු තෙන්නකෝන් මහතා ධුරයේ බලය අවභාවිත කර, විෂමාචාර ක්‍රියාවල නිරත වී ඇති බව ඒ සම්බන්ධයෙන් සොයා බැලීමට පත්කල පාර්ලිමේන්තු පරීක්ෂණ කමිටුව විසින් සිය වාර්තාවේ සඳහන් කරමින් තෙන්නකෝන් මහතා පොලිස්පතිධූරයෙන් නෙරපීම සඳහා නිර්දේශ කර ඇතැයි කථානායක වෛද්‍ය ජගත් වික්‍රමරත්න මහතා පාර්ලිමේන්තුවට අද දැනුම් දුන්නේය
දේශබන්දු තෙන්නකෝන් මහතා ධුරයේ බලය අවභාවිත කර, විෂමාචාර ක්‍රියාවල නිරත වී ඇත්දැයි සෙවීම සඳහා පත්කළ පාර්ලිමේන්තු පරීක්ෂණ කමිටු වාර්තාව තමන් වෙත ලැබී ඇති බවත් ව්‍යවස්ථාමය ක්‍රියාවලිය තුළ මෙය ඓතිහාසික අවස්ථාවක් සනිටුහන් කරන බවද කතානායකවරයා සඳහන් කළේය.
මෙවැනි ආකාරයට නීතියේ විධානය සහ පාර්ලිමේන්තු ඉතිහාසය තුළ මෙවැනි කමිටුවක් විසින් පොලිස්පතිවරයෙකු ඉවත් කිරීම වෙනුවෙන් තම නිර්දේශ ඉදිරිපත් කළ පළමු අවස්ථාව මෙය බවද කතානායකවරයා අවධාරණය කළේය.
ඒ අනුව දේශබන්දු තෙන්නකෝන් මහතා පොලිස්පතිධූරයෙන් ඉවත් කිරීමට අදාල විවාදය සහ ඊට අදාල ඡන්දය පැවැත්වෙන දිනය කථානායක වරයා ඉදිරියේදී දැනුම්දීමට නියමිතය.
එම විවාදයෙන් පාර්ලිමේන්තුවේ සමස්ත මන්ත්‍රීවරුන්ගේ බහුතරයක් දේශබන්දු තෙන්නකෝන් මහතා පොලිස්පතිධූරයෙන් නෙරපීමට ඡන්දය ලබාදුනහොත් ඒ බව කථානායකවරයා ජනාධිපතිවරයාව දැනුවත් කරනු ලබයි. ඒ අනුව ඔහුව පොලිස්පතිධූරයෙන් නෙරපා හරිනු ලබන්නේ ජනාධිපතිවරයාය.