පාස්කු දින ඉරිදා ත්‍රස්ත ප්‍රහාරය එල්ල කළ අපරාධකරුවන් විසින් එම ප්‍රහාරයට පෙර වව්නතිව් පොලිස් මුරපොලේ සේවයේ නිරත නිලධාරීන් දෙදෙනෙක් ඝාතනය කර ටී 56 ගිනි අවි දෙක පැහැර ගැනීම සම්බන්ධයෙන් වූ විමර්ශන නොමග යවා අපරාධකරුවන් අනාවරණය වීම වැලැක්වීමට කටයුතු කරමින් එම අපරාධකරුවන්ට පාස්කු ඉරුදින ප්‍රහාරය එල්ල කිරීම දක්වා අවකාශ සලසා දීම සම්බන්ධයෙන් සැකපිට මඩකලපුව කොට්ඨාශ බුද්ධි අංශයේ එකල සේවයේ නිරතව සිටි ස්ථානාධිපතිවරයා අපරාධ පරීක්ෂණ දෙපාර්තමේන්තුවේ විශේෂ ඒකකයේ නිලධාරීන් විසින් ඊයේ (21) අත්අඩංගුවට ගෙන ඇත.
පොලිස් පරීක්ෂකවරයෙක් වන මෙම නිලධාරියා අත්අඩංගුවට ගන්නා විට සේවයේ නිරතව සිට ඇත්තේ වාන් ඇල පොලිස් ස්ථානයේ පාලන අංශයේ ස්ථානාධිපතිවරයා ලෙසිනි.
2019 වසරේ අප්‍රේල් 21 දා පාස්කු ඉරුදින එල්ලකල ත්‍රස්ත ප්‍රහාරයට සම්බන්ධ සැකකරුවන් විසින් සිදුකළ පූර්ව අපරාධයක් වන වව්නතිව් හී පොලිස් නිලධාරීන් දෙදෙනාගේ ඝාතනයේ විමර්ශන නොමග යැවීම, ඒ තුළින් නියම අපරාධකරුවන් අනාවරණය නොවීම සහ එම නියම අපරාධකරුවන් පාස්කු ඉරුදින ප්‍රහාරය එල්ල කිරීම දක්වා අවකාශ සැලසීමට මෙම පොලිස් නිලධාරියා ඝෘජුවම වගකිව යුතු බව විමර්ශනයේදී පෙනී ගිය බැවින් ඔහුව අත්අඩංගුවටගත් බව උසස් පොලිස් නිලධාරියෙක් සඳහන් කළේය.
ත්‍රස්තවාදය වැලැක්වීමේ (තාවකාලික විධිවිධාන) පනතට අදාලව අපරාධ පරීක්ෂණ දෙපාර්තමේන්තුව විසින් අත්අඩංගුවටගත් මෙම සැකකාර පොලිස් නිලධාරියා පැය 72ක කාලයක් රදවා තබාගනිමින් විමර්ශන පවත්වන බවද එම උසස් පොලිස් නිලධාරියා කීය.
බ්‍රිතාන්‍ය චැනල් 04 නාලිකාවේ වැඩ සටහනකට පෙනී සිටි අසාද් මවුලානා විසින් කළ හෙළිදරව්ව පිළිබදව කෙරන විමර්ශනයන්ට අදාලව වව්නතිව් පොලිස් නිලධාරීන් දෙදෙනාගේ ඝාතන විමර්ශනය නැවත ආරම්භකර තිබේ.
2018 වසරේ නොවැම්බර් 29 වෙනිදාය වව්නතිව් පොලිස් නිලධාරීන් දෙදෙනාගේ ඝාතනය සිදුවිය. එම ඝාතනය කළ සැකකරුගේ යැයි හැඟවෙන ආකාරයට හිටපු එල්.ටී.ටී.ඊ. සාමාජිකයෙකුගේ නිවසේ තිබුණු ජැකට්ටුවත් සොරාගෙන එම ජැකට්ටුව එම ඝාතනය සිදුවූ ස්ථානයට ආසන්නයේ වෙල් යායක බෝක්කුවක් යටට දමා ඇත්තේ මෙම පොලිස් නිලධාරියා බවට තොරතුරුද විමර්ශන වලින් හෙළිවී ඇත. ජැකට්ටුව වෙල්යායේ දමා ඇත්තේද එම එල්.ටී.ටී.ඊ. සාමාජිකයා නීති විරෝධි ආකාරයට ඔහු භාරයේ දින කිහිපයක් රදවා තබා ගැනීමෙන් අනතුරුව බවද අනාවරණය වී තිබේ.