මිනිස් ඝාතනයක් සඳහා සූදානමින් ටී 56 අවියක් රැගෙන යමින් සිටි හිටපු එල්.ටී.ටී.ඊ. සාමාජිකයෙක් අත්අඩංගුවට ගෙන කළ ප්‍රශ්න කිරීමේදී හෙළිවූ තොරතුරු මත වව්නියාව නෙරියකුලම ප්‍රදේශයේ සිදු කළ මෙහෙයුමකින් ත්බෝම්බ 86ක්, ටී 56 අවි වලට යොදන පතොරම් 321ක් සහ මත්ද්‍රව්‍ය රැසක් අද (22) සොයාගෙන ඇත.
වැඩ බලන පොලිස්පති නීතීඥ ප්‍රියන්ත වීරසූරිය මහතාගේ නියෝග මත මේ දිනවල ක්‍රියාත්මක විශේෂ මෙහෙයුමේ නිරතව සිටි කිරිබත්ගොඩ පොලිසියේ නිලධාරීන් ඊයේ (22) රාත්‍රී කාලයේ දී ත්‍රිරෝද රථයක් පරීක්ෂා කිරීමේදී එහි ගමන්කරමින් සිටි පුද්ගලයෙක් ටී 56 වර්ගයේ අවියක් සහ ඊට යොදන පතොරම් 30ක් සමඟ අත්අඩංගුවට ගැනීමට හැකිවී ඇත. වව්නියාවේ පදිංචිකරුවෙක් වන 30 හැවිරිදි එම සැකකරුගෙන් කළ ප්‍රශ්න කිරීමේදී අනාවරණය වී ඇත්තේ ඔහු යුද්ධය අවසන් කාලයේදී එල්.ටී.ටී.ඊ.යට සම්බන්ධව සිට ඇති බවය. එකල ඔහු බාලවයස්කරුවෙකි.
ගිනි අවිය සම්බන්ධයෙන් කළ ප්‍රශ්න කිරීමේදී පවසා ඇත්තේ වව්නියාවේ සිටින මත්ද්‍රව්‍ය ජාවාරමට සම්බන්ධ පුද්ගලයෙක් විසින් මෙම අවිය කිරිබත්ගොට රැගෙන යන ලෙස තමන්ට දැනුම්දුන් බවය. ගිනි අවිය රැගෙන ඔහුට යාමට නියමිතව තිබී ඇත්තේ කිරිබත්ගොඩ පිහිටි හෝටලයකටය.
එතැවට පැමිණෙන පුද්ගලයෙක් ගිනි අවිය රැගෙන ගොස් මෝදර ඉබ්බගේ වත්තේ පුද්ගලයෙකුට වෙඩි තැබීමට සූදානමින් සිට ඇත. මත්ද්‍රව්‍ය ආරවුලක් මත ඩුබායි හී රැදී සිටින පාතාලයේ අපරාධකරුවෙක් විසින් මෙම වෙඩි තැබීම සැළසුම්කර තිබී ඇත.
ප්‍රශ්න කිරීමේදී හෙළිවී ඇත්තේ තවදුරටත් පාතාලයට අවි ආයුධ උතුරෙන් එන බවය. ඊට සම්බන්ධ සැකකරුවෙක් ගැන තොරතුරු අත්අඩංගුවට ගත් සැකකරුගෙන් හෙළිවීමත් සමඟ ඒ බව වන්නි නියෝජ්‍ය පොලිස්පති දැනුවත් කිරීමට පියවර ගෙන තිබේ. ඒ අනුව අද උදෑසන වව්නියාව කොට්ඨාශ අපරාධ විමර්ශන කාර්යාංශය නිලධාරීන් විසින් නෙරියකුලමේ කළ වැටලීමකින් සැකකරුවෙක් අත්අඩංගුවට ගෙන ඇත.
මෙම සැකකරු වයස අවුරුදු 22ක් වයසැති අයෙක් බව පොලිසිය කියයි. සොයාගත් අත්බෝම්බ විවිධ වර්ගයන්ට අයත් ඒවාය. අයිස් මත්ද්‍රව්‍ය ග්‍රෑම් 10ක්ද, මත්කරල් 5600ක්ද සැකකරු සතුව තිබී සොයාගෙන තිබේ.