පාස්කු ඉරිදා එල්ලවූ ත්‍රස්ත ප්‍රහාරය ගැන කල්තියා ඉන්දියානු බුද්ධි අංශයකින් තොරතුරු ලැබී තිබියදීත් එම ප්‍රහාරය වලක්වා ගැනීමට නිසි ක්‍රියා මාර්ග නොගැනීම සම්බන්ධයෙන් රාජ්‍ය බුද්ධි සේවයේ හිටපු අධ්‍යක්ෂ ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන මහතා පොලිස් වහාම ක්‍රියාත්මක වන ලෙස සේවයෙන් පහ කිරීමට ජාතික පොලිස් කොමිෂන් සභාව තීරණයකර තිබේ.
නිලන්ත ජයවර්ධන මහතා සම්බන්ධයෙන් පැවති ත්‍රී පුද්ගල විනිශ්චය සභාව වාර්තාව කොමිෂන් සභාවට ලැබීමෙන් අනතුරුව පසුගිය 17 වෙනිදා රැස්වූ ජාතික කොමිෂන් සභාව එම විනය පරීක්ෂණ මණ්ඩල වාර්තාව ගැඹුරින් සලකා බලා මෙම තීරණයට එළඹ ඇත.
ජාතික පොලිස් කොමිෂන් සභාව විසින් නිලන්ත ජයවර්ධන මහතා සම්බන්ධයෙන් විනය පරීක්ෂණයක් පැවැත්වීමට ත්‍රී පුද්ගල විනිශ්චය සභාවක් පත්කරනු ලබන්නේ 2024 වසරේ ජූලි 01 වෙනිදාය. විශ්‍රාමික මහාධිකරණ විනිසුරු චම්පා රාජරත්නම් මහත්මියගේ ප්‍රධානත්වයෙන් පත්කරනු ලැබූ එම ත්‍රී පුද්ගල විනිශ්චය සභාව සෙසු සාමාජිකයන් ලෙස පරිපාලන සේවයේ ජ්‍යෙෂ්ඨතම නිලධාරීන් වූ ඒ.එච්. ගමගේ සහ එස්. කේ .ලියනගේ මහත්වරු කටයුතු කරනු ලැබීය.
ජාතික පොලිස් කොමිෂන් සභාව විසින් මූලික විමර්ශනයක් සිදුකර 2023 ඔක්තෝබර් 26 දින රැස්ව වූ ජාතික පොලිස් කොමිෂන් සභාවේ තීරණය පරිදි අංක NPC/EST/DISC/ASP/1/2023 අංකය ය‍ටතේ 2023 වසරේ නොවැම්බර් 17 වෙනිදා ඔහු වෙත චෝදනා පත්‍රයක්ද නිකුත්කරනු ලැබීය.
එම චෝදනා පත්‍රය සම්බන්ධයෙන් නිලන්ත ජයවර්ධන මහතා 2024 වසරේ මාර්තු 12 දිනැතිව පිළිතුරු ලිපියක් ජාතික පොලිස් කොමිිෂන් සභාවට යොමුකර තිබේ. ඒ අනුව 2024 වසරේ මාර්තු 21 වෙනිදා රැස්වූ ජාතික පොලිස් කොමිෂන් සභාව තීරණය කරනු ලබන්නේ නිලන්ත ජයවර්ධන මහතා සම්බන්ධයෙන් විධිමත් විනය පරීක්ෂණයක් පැවැත් වීමටය.
ඊට අදාලව ත්‍රී පුද්ගල විනිශ්චය සභාව එම වසරේ ජුලි මාසයේ මුල පත්කරනු ලබන ජාතික පොලිස් කොමිෂන් සභාව රැස්වී නිලන්ත ජයවර්ධන මහතාගේ වැඩ තහනම් කිරීමටටද 2024 වසරේ ජූලි 18 වෙනිදා තීරණය කරනු ලැබීය. ඒ වන විට ඔහු සේවයේ නිරතව සිටින්නේ පොලිස්පතිවරයාගෙන් පසු පොලිස් සේවයේ ඇති ඉහළම තනතුර සේ සැලකෙන පොලිස් පරිපාලන අංශ ප්‍රධානී ධූරයයි.
සිදුකරන ලද විධිමත් විනය පරීක්ෂණයේ ත්‍රී පුද්ගල විනිශ්චය සභාව විසින් පසුගිය 04 දින ජාතික පොලිස් කොමිෂන් සභාව වෙත යොමු කර තිබේ. එම වාර්තාව සමග යොමුකර තිබූ පැමිණිල්ල මෙහෙයවීමේ නිලධාරිගේ වාර්තාව, රැකවරණ නිලධාරිගේ වාර්තාව සහ අදාල සියලු ලේඛන ගැඹුරින් අධ්‍යනය කරන ලද ජාතික පොලිස් කොමිෂන් සභාව විසින්
- විධිමත් විනය පරීක්ෂණ වාර්තාව අනුව චෝදනා පත්‍රයේ සදහන් සියලු චෝදනා සදහා ජෙයෙෂ්ඨ නියෝජ්‍ය පොලිස්පති (අනිවාර්ය නිවාඩු ගන්වන ලද), නිලන්ත ජයවර්ධන මහතා වරදකරු බවත්,
-
ඉහත චෝදනා ආයතන සංග්‍රහයේ ii වන කාණ්ඩයේ සදහන් රාජ්‍ය නිලධරයන් විසින් සිදු කල හැකි වරදවල් සම්භන්ධව පළමුවන උපලේඛ්නය යටතට ගැනෙන වැරදි බවත් නිරීක්ෂණයකර තිබේ.
මෙම කරුණු සැලකිල්ලට ගෙන නිලන්ත ජයවර්ධන මහතා චෝදනා පත්‍රයේ සදහන් සියලු චෝදනාවන් සදහා වැරදිකරු බව පසුගිය 17 වන දින රැස්වූ ජාතික පොලිස් කොමිෂන් සභාව විසින් තීරණය කර ඇත.
ඒ අනුව ඔහු විසින් කරන ලද වරදේ තීව්‍ර තාවය සැලකිල්ලට ගෙන ආයතන සංග්‍රහයේ ii ඛාණ්ඩයේ XLVIII වන පරිච්ඡේදයේ 24:3:1 වගන්තිය පරිදි ජෙයෙෂ්ඨ නියෝජ්‍ය පොලිස්පති නිලන්ත ජයවර්ධන මහතා වහාම ක්‍රියාත්මක වන පරිදි සේවයෙන් පහ කිරීමට ජාතික පොලිස් කොමිෂන් සභා සැසිවාරයේදී තීරණය කර තිබේ.