මහජන බැංකුවේ බණ්ඩාරවෙල ශාඛාවේ සිදුව ඇති රුපියල් ලක්ෂ 80කට අධික මුදල් වංචාවක් සම්බන්ධයෙන් විමර්ශන පැවැත්වූ අපරාධ පරීක්ෂණ දෙපාර්තමේන්තුවේ වාණීජ අපරාධ විමර්ශන අංශය බැංකු සේවකයින් පස් දෙනෙක් ඊයේ අත්අඩංගුවට ගත්තේය.
රුපියල් 8,054,513.07ක් වූ මෙම වංචාව සම්බන්ධයෙන් සාපරාධී විශ්වාසය කඩකර වංචා කිරීමට ආධාර අනුබලදීම සම්බන්ධයෙන් මෙම පිරිස අත්අඩංගුවට ගත් බව අපරාධ පරීක්ෂණ දෙපාර්තමේන්තුව සඳහන් කරයි. මේ අතර සැකකාරියන් දෙදෙනෙක්ද සිටින්නීය.
ඒ එක් කාන්තාවක් අවුරුදු 67ක් වයසැති විශ්‍රාමික බැංකු සහකාර කළමනාකාරීවරියකි. ඇය බණ්ඩාරගම පදිංචිකාරියක් බව අපරාධ පරීක්ෂණ දෙපාර්තමේන්තුව සඳහන් කරයි.
දෙවැනි කාන්තාව සහකාර බැංකු කළමනාකාරියකි. අභ්‍යන්තර විගණන දෙපාර්තමේන්තුවේ ප්‍රධාන ප්‍රාදේශීය කාර්යාලයේ සේවිකාවක් වන ඇය 58 හැවිරිදි වියැතිය. ඇයද බණ්ඩාරවෙල පදිංචිකාරියකි.
තුන්වැන්නා බදුල්ල මුතියංගන ශාඛාවේ සේවයේ නිරතව සිටි 67 වියැති විශ්‍රාමික නියෝජ්‍ය කළමනාකරුය. ඔහුද බණ්ඩාරවෙල පදිංචිකරුවෙකි.
සිව් වැන්නා දියතලාව ශාඛාවේ සේවයේ නිරතව සිටි බණ්ඩාරවෙල පදිංචිකරුවෙකි. 36 හැවිරිදි වියේ පසුවන බණ්ඩාරවෙල පදිංචිකරුවෙකි.
පස් වැන්නා බණ්ඩාරවෙල ශාඛාවේ සේවයේ නිරතව සිටි විශ්‍රාමික කළමනාකරුය. වයස අවුරුදු 69ක් වන ඔහු හැලි ඇල පදිංචිකරුයෙකි.
