මහර බන්ධනාගාරයේ සේවයේ නිරත නියාමකවරයෙකුගේ මුල්ලේරියාවේ පිහිටි නිවසේ පැවති මත්පැන් සාදයකට සහභාගි වූ ඔහුගේ මිතුරෙක් වන මත්කුඩු ජාවාරම්කරුවෙක් මත්පැන් විෂ වීමකින් මියගොස් ඇතැයි මුල්ලේරියාව පොලිසිය සඳහන් කරයි.

මියගොස් සිටින එම මත්කුඩු ජාවාරම්කරු හෙරොයින් කිලෝ 52ක් සහ ටී 56 ගිනි අවි 03ක් සමඟ පොලිසියට හසුවී දීර්ඝ කාලයක් රක්ෂිත බන්ධනාගාරගතව මෑත කාලයේදී ඇප මත නිදහස්ව ලබා සිටියෙක් වන මොහොමඩ් සුබෙයිර් නොහොත් සුමේධ නැමැති පුද්ගලයාය. ඔහු වැල්ලම්පිටිය වෙන්නවත්තේ පදිංචිකරුවෙකි.

බන්ධනාගාර නියාමකට අමතරව සාදයට සහභාගිවී සිටි තවක් අයෙක් ද මත්පැන් විෂවීමෙන් අසාධ්‍යව මුල්ලේරියාව රෝහලට ඇතුලත්ව ප්‍රතිකාර ලබන බව පොලිසිය සඳහන් කරයි. එම පුද්ගලයා ද වෙන්නවත්තේ පදිංචිකරුවෙක් බව සඳහන්ය.

මෙම මත්පැන් සාදය සංවිධානය කර ඇත්තේ පසුගිය 25 වෙනිදා රාත්‍රී කාලයේදීය. බන්ධනාගාර නියාමක මෙම සාදය සංවිධානයකර ඇති බව විමර්ශන වලින් පෙනී යන බව පොලිසිය සඳහන් කරයි. සාදය නිමාවීමෙන් අනතුරුව තිදෙනා නින්දට ගොස් ඇත. ඔවුන් රෝගී තත්ත්වයට පත්ව ඇත්තේ 26 වෙනිදා අළුයම් කාලයේදීය. එහිදී තිදෙනාම මුල්ලේරියාව රෝහලට ඇතුලත් කිරීමට නිවැසියන් පියවර ගෙන ඇත. ඔවුන් අතර සිටි සුමේධ නැමැති අය රෝහල් ගත කිරීමෙන් පසු මියගොස් ඇති බව පොලිසිය සඳහන් කරයි.