හෝමාගම පිටිපන කිරිබේරිය කැලේ මහින්ද මාවතේ වැසියන් විසින් ඊයේ සංවිධානය කළ බක්මහ උළෙල අවසානයේ පැවති සංගීත ප්‍රසංගය නිමාවීමත් සමග පිරිසක් විසින් ආරක්ෂාවට යොදවා සිටි පොලිස් නිලධාරීන්ට ගල්මුල් ප්‍රහාරයක් එල්ලකර ඇත.

මෙම ප්‍රහාරයෙන් කුවාල ලැබූ හෝමාගම පොලිසියේ ප්‍රධාන පොලිස් පරීක්ෂක ප්‍රිියශාන්ත නැමැති නිලධාරියා හෝමාගම රෝහලින් ප්‍රතිකාරද ලබා තිබේ.

මෙම බක්මහ උළෙල සහ සංගීත ප්‍රසංගය සඳහා උදෑසන 7.00 සිට රාත්‍රී 10.00 දක්වා පොලිසිය ශබ්ද විකාශන බලපත්‍ර ලබාදී තිබී ඇත.

රාත්‍රී 10.00 වන විිට පොලිසිය සංවිධායකයන්ට දැනුම්දී ඇත්තේ ශබ්ද විකාශන යන්ත්‍ර භාවිතා කිරීමට ලබාදී ඇති කාලය අවසන් බැවින් ප්‍රසංගය නතරකරන ලෙසය. පොලිසියේ එම දැනුම්දීම නොතකා දිගින් දිගටම සංගීත ප්‍රසංගය පවත්වාගෙන ගිය සංවිධායක මණ්ඩලය අවසානයේදී රාත්‍රී 11.00ට පමණ ප්‍රසංගය නවතා ඇත්තේ පොලිසියේ දැඩි බලපෑම හමුවේය.

ප්‍රසංගය නතර කිරීීමෙන් අනතුරුව ගල්මුල් ප්‍රහාරයක් පොලිස් නිලධාරීන්ට එල්ලකර ඇත්තේ ද සංවිධායක මණ්ඩලයේම පිරිසක් බව විමර්ශන වලින් අනාවරණය වී ඇත. ඒ අය අත්අඩංගුවට ගැනීමට විමර්ශන පැවැත්වෙන බව පොලිසිය සඳහන් කළේය.