පවතින කොවිඩ් වෛරස ව්‍යාප්තිය හමුවේ දුම්රිය මගීන්ට පහසුකම් සලසාදීම සඳහා රාජ්‍ය සේවකයින්ගේ කාර්යාල වේලාවන් සංශෝධනය කරදෙන ලෙස දුම්රිය දෙපාර්තමේන්තුව රජයෙන් ඉල්ලීමක් කිරීමට තීරණය කර ඇත.

ඒ අනුව ඊට අදාළ ලිපිය අද (04) දිනයේ දුම්රිය සාමාන්‍යාධිකාරීවරයා විසින් රාජ්‍ය පරිපාලන අමාත්‍යාංශයේ ලේකම්වරයා වෙත යොමු කිරීමට නියමිත බව වාර්තාවේ.

දුම්රිය වාර ප්‍රවේශ පත්‍ර මගින් පමණක් දුම්රියෙන් ගමන් කරන පිරිස් 65,000කට ආසන්න වේ.

නමුත් වත්මන් තත්වය හමුවේ දුම්රිය ආසන ලබාදිය හැක්කේ 26,000 වැනි සංඛ්‍යාවකට පමණි.

එබැවින් රාජ්‍ය සේවකයින්ගේ සේවයට පැමිණීමේ වේලාව සහ සේවා අවසන් කිරීමේ වෙලාව කොටස් දෙකකට වෙන්කර මේ කටයුතු පහසු කර දෙන ලෙස ඔහු ඉල්ලා සිටී.