නිරෝධායන නීති කඩකරමින් මුහුණු ආවරණ නොපැළද හෝ සමාජ දුරස්ථභාවය ආරක්ෂා නොකිරීම සම්බන්ධයෙන් අත්අඩංගුවට ගැනෙන පුද්ගලයන් ඒ සම්බන්දයෙන් අධිකරණයේදී වරදකරුබවට පත්වුවහොතේ රුපියල් 10,000 ක දඩයක් හා මාස 06 ක සිරදඩුවමකට යටත්වනු ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතීඥ අජිත් රෝහන මහතා අවධාරණය කරයි.

මේ වන විට කොවිඩ් 19 වෛරසය රටපුරා ව්‍යාප්තවීමේ අවධානමක් තිබෙන බැවින් නිරෝධායන නීති උපරිමයෙන් ආරක්ෂාකරන ලෙස අජිත් රෝහන මහතා ජනතාවගෙන් ඉල්ලීමක් කරයි.

දිවයින පුරා නිරෝධායන රීති කඩ කළ පුද්ගලයින් 145 දෙනෙකු ඊයේ (27) දිනය තුළ පොලීසිය විසින් අත්අඩංගුවට ගත් බවද අජිත් රෝහන මහතා සදහන් කළේය.

මොනරාගල, ත්‍රිකුණාමලය සහ කළුතර යන ප්‍රදේශවලින්දී වැඩි පිරිසක් අත්අඩංගුවට පත්ව තිබෙන බවද අජිත් රෝහණ මහතා පැවසීය.

පොලීසිය විසින් පසුගිය වසරේ ඔක්තෝබර් 30 සිට මේ දක්වා නිරෝධායන නීති උල්ලංඝණය කිරීම් සම්බන්ධයෙන් අත්අඩංගුවට ගෙන ඇති සමස්ත පුද්ගලයින් ගණන 3,900කි.