වසර තිහක් තිස්සේ පැවැති යුද්ධයේදී ජීවිත අහිමි ව ඇත්තේ 29,000 පමණ වූවත් ගෙවී ගිය දස වසර තුළ රිය අනතුරුවලින් පුද්ගල ජීවිත 27000 ක් අහිමි වී ඇතැයි මහජන ආරක්ෂක අමාත්‍ය රියර් අද්මිරාල් ආචාර්ය සරත් වීරසේකර මහතා සදහන් කරයි.
“බොහෝ දෙනා සිතන්නේ මත්පැන් භාවිතා කර බීමත් රිය ධාවනය තුළ අනතුරු වැඩි වෙනවා කියලා. සමස්ත රිය අනතුරු සංඛ්‍යාවේ ප්‍රතිශතයක් ලෙස ගත්කල බීමත් අනතුරු සිදුව ඇත්තේ සියයට 04 ක් පමණයි. සියයට 48 ක් රිය අනතුරු සිදු වන්නේ සාමාන්‍ය මාර්ග නීති උල්ලංඝනය කිරිම තුලින්. එම අනතුරුවලින් සියයට 50 වඩා වැඩි ප්‍රතිශතයක් ගංජා, අයිස්, මත්කුඩු හා වෙනත් මත්ද්‍රව්‍ය භාවිත කර වාහන පැදවීම තුළින් සිදුවන බව අනාවරණය වී තිබෙනවා.“ යැයිද මහජන ආරක්ෂක ඇමති රියර් අද්මිරාල් ආචාර්ය සරත් වීරසේකර මහතා පැවැසීය.
මෙම අදහස් ඇමතිවරයා සදහන් කරනු ලැබුවේ මත්ද්‍රව්‍ය පරීක්ෂාවට සුදුසු උපකරණ භාවිතය සම්බන්ධව රේඛීය අමාත්‍යංශ දෙපාර්තමේන්තු හා සංවිධාන සමග පැවති රැස්වීමකදීය.
