මහින්ද-රිච්මන්ඩ් 117වැනි ගාලු ආදරවන්තයන්ගේ සටනට සමඟාමීව පැවැති වාර්ෂික එක්දින තරගය ලකුණු 17කින් ජය ගැනීමට මහින්ද විද්‍යාලය සමත්විය.

ගාල්ල මහින්ද විද්‍යාලයීය ක්‍රීඩාංගණයේ පසුගිය 10 වැනිදා පැවැති තරගයේ කාසිය වාසිය දිනූ මහින්ද නායක කුෂාන් මදූෂ පළමුව පන්දුවට පහරදීමට තීරණය කළේය.

එහිදී පන්දුවාර 49.4කදී සියලු දෙනා දැවී ලකුණු 226ක් රැස් කිරීමට මහින්ද විදුහල් කණ්ඩායම සමත්විය. මහින්ද ඉනිම ගොඩනැගීමට දායක වූ දිනුර කළුපහන ලකුණු 49ක් ලබා ගත් අතර මහින්දය වෙනුවෙන් විශිෂ්ට ඉනිමක් ක්‍රීඩා කළ උප නායක ධනුජ ඉඳුවර පන්දු සියයකදී ලකුණු 100ක් ලබා ගනිමින් මහින්ද ඉනිම ශක්තිමත් කළේය.

ඉවසිලිමත් ඉනිමක් ක්‍රීඩා කළ ධනුජ ඉඳුවර එක් අන්තයක් ආරක්ෂා කර ගනිමින් හයේ පහර හයකින් සහ හතරෙ පහර 8කින් සිය ඉනිම වර්ණවත් කළේය.

පන්දු යැවීමේ දී රිච්මන්ඩ් විද්‍යාලය වෙනුවෙන් තරින්ද නිර්මාල් ලකුණු 43ට කඩුළු 3ක් දවා ගත් අතර ෂෙරෝන් අභිෂේක් ලකුණු 31කට කඩුලු 2ක් බිඳ දැමීය.

පිළිතුරු ඉනිම ක්‍රීඩා කළ ගාල්ල රිච්මන්ඩ් විද්‍යාලයීය කණ්ඩායමට සියලු දෙනා දැවී ලබාගත හැකිවූයේ ලකුණු 209 ක් පමණි. මෙහි දී තරිදු නිර්මාල් ලකුණු 41 ක් සහ කල්ප නෙත්සර ලකුණු 37 ලබා ගනිමින් රිච්මන්ඩ් විද්‍යාලයේ ඉනිම ශක්තිමත් කළ අතර විශිෂ්ට ලෙස පන්දු යවමින් ඔවුන්ගේ ජයග්‍රහණය අහුරා දැමූ මහින්ද කණ්ඩායමේ කුෂාන් මදුෂ 29/4 සහ ෂෙහාන් හසරංග 32/2 ලෙස කඩුළු බිඳ හෙලූහ.

තරගයේ වීරයා සම්මානය ධනුජ ඉදුවර විසින් දිනා ගන්නා ලදි.