සියලුම කැබිනට් අමාත්‍යවරු සිය ධුරවලින් ඉල්ලා අස්වීමට තීරණය කර තිබේ.
පාර්ලිමේන්තු මන්ත්‍රී විජයදාස රාජපක්ෂ මහතා පැවසුවේ, සර්ව පාක්ෂික ආණ්ඩුවකට ඉඩ සලසමින් සියලුම අමාත්‍යවරු එම තීරණය ගෙන ඇති බවය.
අද (11) පෙරවරුවේ පැවති කැබිනට් රැස්වීමකින් අනතුරුව මාධ්‍යයට අදහස් දක්වමින් ඔහු මේ බව සඳහන් කළේය.
මේ අතර අග්‍රාමාත්‍ය රනිල් වික්‍රමසිංහ අමාත්‍ය මණ්ඩලයේ අමාත්‍යවරුන් සමඟ අද පෙරවරුවේ අග්‍රාමාත්‍ය කාර්යාලයේ දී පැවැත්වූ සාකච්ඡාවට සහභාගී වූ සියලුම අමාත්‍යවරුන්ගේ අදහස වූයේ සර්ව පාක්ෂික රජයක් පිහිටුවීමට එකඟත්වයක් ඇතිවූ වහාම, එම රජයට වගකීම් භාර දීමට සූදානම් බව යැයි අග්‍රාමාත්‍ය කාර්‍යාලය නිවේදනය කළේය.