නිරෝධායන ඇදිරි නීතිය උල්ලංඝණය කරමින් සිය පුතාව යාපනයේ සිට කොළඹට ඇදිරි නීති බලපත්‍රයක් නොමැතිව රැගෙන පැමිණිම සහ නිරෝධායනයෙන් පසු තවත් දින 14 කාලයක් ස්යං නිරෝධායනය විය යුතු සිය දියණියව නිරෝධායන උපදෙස් නොතකා මැතිවරණ කොමිසම් සභා කාර්යාලයට කැටුව පැමිණිම සම්බන්ධයෙන් මැතිවරණ කොමිසමේ සාමාජිකයෙක් වන රත්නජීවන් හූල් මහතා සම්බන්ධයෙන් කළ විමර්ශන ගොනුව යාපනය නියෝජ්‍ය පොලිස්පති මහේෂ් සේනාරත්න මහතා විසින් ඉදිරි නීතිමය කටයුතු සදහා පොලිස් නීති කොට්ඨාශයට 26 වැනිදා යොමු කර තිබේ.
රත්නජීවන් හූල් මහතා ඇදිරි නීති උල්ලංඝණය කරමින් සිය පුතාව රැගෙන කොළඹට පැමිණ ඇද්ද?සහ නිරෝධායනය වෙමින් සිටි දියණිය මැතිවරණ කොමිසන් සභා කාර්යාලයට කැදවාගෙන පැමිණ තිබේද? යන්න ගැන විමර්ශනයක් පවත්වන ලෙස පොලිස් මූලස්ථානය විසින් කළ දැනුම් දීමකට අනුව යාපනය නියෝජ්‍ය පොලිස්පතිවරයා යටතේ එම විමර්ශනය සිදුව ඇත.
එම විමර්ශනයේදී ඒ සියළු කාරණා සාක්ෂි සහිතව අනාවරණය වී තිබෙන බව සදහන්ය. යාපනයේ සිට පුතාව කොළඹට රැගෙන ගොස් ඇත්තේ ඇදිරි නීති බලපත්‍රයක් නොමැතිවය. ඒ දිස්ත්‍රික් අතර ගමන් තහනමක්ද පවතින විට බව වාර්තාවේ සදහන්ව ඇතැයිපොලිස් ආරංචි මාර්ග අනාවරණය කළේය. හූල් මහතාට ඇදිරි නීති බලපත්‍රයකින් තොරව මැතිවරණ කොමිසමේ රැස්වීම් වලට සහභාගිවීමට යාපනයේ සිට ගමන් කිරීමට ඇදිරි නීති බලපත්‍රයක් අවශ්‍ය නොවූවත් ඔහුගේ පුතා ඇදිරි නීති බලපත්‍රයක් නොමැතිව ගමන් කිරීම ගැටළුවක් බව එම වාර්තාවේ සදහන්ය.
හූල් මහතාගේ දියණිය එංගලන්තයේ සිට පැමිණ නිරෝධායනය වී ඇත්තේ තරුපන්තියේ හෝටලයකදී මුදල්ගෙවාය. එම හෝටලය ආරක්ෂක අංශයයටතේ පවතින නිරෝධායන මධ්‍යස්ථානයකි. නිරෝධායනයෙන් පසු ඇයට නිරෝධායනය අවසන් කළබවට වූ සහතිකයද නිකුත් කර තිබී ඇත. නිරෝධාන මධ්‍යස්ථාන වල නිරෝධායනය වූ පිරිස් සිය ගම්බිම් වලට රැගෙන යන්නේ හමුදාවේ අධික්ෂණයෙන් හමුදාවේ වාහන වල නන්වාගෙනය. ඒ අය ස්යං නිරෝධායනයට යොමුකර ඒ බව මහජන සෞඛ්‍ය පරීක්ෂකවරුන්ටද දැනුම් දෙනු ඇත. එහෙත් මෙම නිරෝධායන මධ්‍යස්ථානයේ නිරෝදායනය වූ පිරිස් සම්බන්ධයෙන් එවැනි ක්‍රියාවලියක් අනුගමනය වී නැති බවත් නිරෝධායනය වූවන්ව හෝටලයෙන්ම නිදහස්කර නිවෙස් බලා යන ලෙස දන්වා ඇතැයි විමර්ශන වලින් පෙනී ගොස් තිබේ. හූල් මහතා සිය දියණියව හෝටලයෙන් රැගෙන කෙළින්ම මැතිවරණ කොමිසමට පැමිණ ඇත්තේ ඒ අනුව බවද විමර්ශන වලින් අනාවරණය වී ඇත.
හූල් මහතා සිය දියණිය මෙන්ම පුතාවද මැතිවරණ කොමිසම වෙත රැගෙන පැමිණි බවට සාක්ෂිද යාපනය නියෝජ්‍ය පොලිස්පතිවරයා යටතේ පැවැති විමර්ශනයේදී අනාවරණය වී තිබේ. හූල් මහතාගෙන් , ඔහුගේ පුතාගෙන් සහ දියණියගෙන් මෙතෙක් පොලීසිය ප්‍රශ්න කර නැත. නීති උපදෙස් ලැබීමෙන් පසු අයගෙන් ප්‍රශ්න කෙරන බව යාපනයේ උසස් නිලධාරියෙක් සදහන් කළේය.
