වෘත්තිමය ප්‍රවාහන සේවාවේ යෙදී සිටින ත්‍රී රෝද රථ, පෞද්ගලික බස් රථ, පාසැල් ළමුන් ප්‍රවාහන රථ, කාර්යාල නිළධාරීන් ප්‍රවාහන රථ, බහලුම් ප්‍රවාහන රථ, වාණිජමය ප්‍රවාහන රථ ඇතුළු ප්‍රවාහන ක්ෂේත්‍රය නියෝජනය කරන පුද්ගලයන්ට ඉන්ධන බෙදාහැරීම සඳහා වන සුදුසු වැඩපිළිවෙලක් සකස් කිරීමේ ක්‍රියාවලිය අද ආරම්භ කර තිබේ.
ඒ විදුලිබල හා බලශක්ති අමාත්‍ය කාංචන විජේසේකර මහතා, මෙම අවස්ථාව සම්බන්ධීකරණය කරමින් නාමල් රාජපක්ෂ මන්ත්‍රීවරයා සහ වාණිජමය ප්‍රවාහන රථ ඇතුළු ප්‍රවාහන ක්ෂේත්‍රය නියෝජනය කරන සංවිධානවල නියෝජිතයන් සමඟ ඒ පිළිබඳ අද පැවති සාකච්ඡාවෙන් පසුවය.
මෙහිදී ඉන්ධන හිඟයන් ඇති වන අවස්ථාවල මෙම කාර්යයන් වෙනුවෙන් ප්‍රමුඛතාවය ලබාදෙමින් ඉන්ධන බෙදා හැරීම පිළිබඳව සාකච්ඡා කර ඇත.
එමෙන්ම එම සෑම ක්ෂේත්‍රයක් සහ රටේ අනෙකුත් අවශ්‍යතා වෙනුවෙන් සලාක ක්‍රමයක් යටතේ ඉන්ධන ලබා දෙන ලෙස සහ වෘත්තීමය ත්‍රී රෝද රථ ඔවුන් ඉන්ධන ලබා ගන්නා එක් ඉන්ධන පිරවුම්හලක පමණක් ලියාපදංචි කර ඉන්ධන දෛනිකව ලබා දෙන ලෙසත් ඉල්ලා සිටින ලදි.
ඒ අනුව එම වැඩපිළිවෙල කඩිනම් කිරීමට මේ වන විට කටයුතු සකස් කිරීමටද පොලීසිය සමග කටයුතු ආරම්භ කළ බව බලශක්ති අමාත්‍යවරයා පවසයි.
