රටේ ඇතැම් තැන්වල මේ දිනවල ඉන්ධනහල් ආශ්‍රිතව ඇතිවූ මහජන කැළඹීම් පිළිබඳ වැඩිවැඩියෙන් වාර්තා ලැබෙමින් තිබෙන බවත් මෙහිදී නීතිය ක්‍රියාත්මක කරන නිලධාරීන් දැඩි ඉවසීමෙන් හා වගකීමෙන් යුතුව මහජනයා සමඟ කටයුතු කිරිම ඉතා වැදගත් බව ශ්‍රී ලංකා නීතිඥ සංගමය පවසයි.
රාජකාරි කරන පොලිස් නිලධාරීන් මහජනයා මුහුණදෙන දැඩි පීඩාව පිළිබඳ දැනුවත්භාවයකින් හා අවබෝධයෙන් යුතුව කටයුතු කිරීම අත්‍යවශ්‍ය බවත් නීතිය ක්‍රියාත්මක කරන නිධාරීන් හැමවිටම සාධාරණ සහ අපක්ෂපාතී විය යුතු බවත් එම සංගමය පෙන්වා දෙයි.
නීතිය හා සාමය සම්බන්ධයෙන් පවත්නා තත්වය පිළිබඳ ශ්‍රී ලංකා නීතීඥ සංගමයේ විධායක කමිටුවේ නිවේදනයක් නිකුත් කරමින් මෙම කරුණු අවධාරණය කර සිටී.
තෙල්, ගැස්, අත්‍යවශ්‍ය ද්‍රව්‍යවල ද දැඩි හිඟයකට මුහුණදීමට ජනතාවට සිදුවුවද මෙම ප්‍රශ්නවලට විසඳුම් ආසන්නයේ පෙනෙන්නේ ද නැති අතරම පෝලිම්වල මරණ කීපයක් ද වාර්තා වී ඇත.
ඖෂධ හිඟය හේතුවෙන් ද මරණ කීපයක් සිදුවී ඇති අතර රටෙහි පවතින බරපතල තත්වය හේතුවෙන් ජනතාවගේ බලාපොරොත්තු සුන්වන තත්වය තුළින් ඔවුන් කෝපයට හා දැඩි අසහනයට පත්වී තිබේ.
එබැවින් රටේ දැනට උද්ගතවී තිබෙන අර්බුද විසඳීම සඳහා රජය කටයුතු කිරීමේදී ජනතාව තුළ විශ්වාසය නැවත තහවුරු කිරීම සහ මහජන විශ්වාසය ගොඩනැගීම ඉතා වැදගත් පියවරක් බව ශ්‍රී ලංකා නීතිඥ සංගමය අවධාරණය කරයි.
රජයේ සහ නීතිය ක්‍රියාත්මක කරන ආයතන කෙරෙහි මහජනයා අතර නිර්මාණය වෙමින් තිබෙන දැඩි අවිශ්වාසය හේතුවෙන් රටට බලපාන භයානක ප්‍රතිඵල ඇති විය හැකි අතර එමගින් නැවත සැකසිය නොහැකි දැඩි හානි සිදු විය හැකි බවද ලංකා නීතිඥ සංගමය කියා සිටී.
