ජාතික නිවාස සංවර්ධන අධිකාරියේ (NHDA) නව සභාපතිවරයා ලෙස රජීව් සූරියආරච්චි මහතා පත් කර ඇතැයි වාර්තා වේ.
ඒ බන්ධනාගාරගතව සිටින හිටපු පාර්ලිමේන්තු මන්ත්‍රී දුමින්ද සිල්වා මහතා වෙනුවට ය.
රජීව් සූරියආරච්චි මීට පෙර ගුවන් තොටුපළ සහ ගුවන් සේවා (ශ්‍රී ලංකා) (පුද්ගලික) සමාගමේ උප සභාපති ලෙස කටයුතු කළේය.
සිරදඬුවම් විඳිමින් සිටි දුමින්ද සිල්වා මහතාට ජනපති සමාව ලැබී නිදහස ලැබීමෙන් පසුව ජාතික නිවාස සංවර්ධන අධිකාරියේ සභාපති ධුරයට පත්කෙරිණ.
භාරත ලක්‍ෂ්මන් ප්‍රේමචන්ද්‍ර මන්ත්‍රී ඝාතන චෝදනාවට වරදකරුවී මරණ දඩුවම නියමව සිටි දුමින්ද සිල්වාට, ජනාධිපතිවැය ලබාදුන් සමාව අත්හිටවූ ශ්‍රේෂ්ඨාධිකරණය වහා ඔහු අත්අඩංගුවට ගන්නැයි (මැයි 31 වැනිදා) නියෝගයක් නිකුත් කළේය.
හිරුණිකා ප්‍රේමචන්ද්‍ර සහ ඇගේ මව ඇතුලු පාර්ශව කිහිපයක් ඉදිරිපත් කළ මූලික අයිතිවාසිකම් පෙත්සම් විභාගයට ගැනීමට අවසර දෙමින් අධිකරණය මේ නියෝගය කළේය.
ජනාධිපති සමාව ලබා දීමට ව්‍යවස්ථාවේ ප්‍රතිපාදන ඇතත් මරණ දඩුවම නියමවූ අයෙකු සම්බන්ධයෙන් සමාව ලබාදීමේදී අනුගමනය කල යුතු ව්‍යවස්ථාවේ සඳහන් ක්‍රමවේදය අනුගමනය කර නැතැයි පෙත්සම්කාර පාර්ශ්ව අධිකරණයට පෙන්වා දී තිබුණි.
ශ්‍රේෂ්ඨාධිකරණය ලබා දුන් නියෝගය අනුව අවශ්‍ය ක්‍රියාමාර්ග ගන්නා ලෙස නීතිපති සංජය රාජරත්නම් විසින් (මැයි 31) දිනම පොලිස්පති සී.ඩී වික්‍රමරත්න වෙත උපදෙස් ලබා දී තිබුණි.
ඒ අනුව දුමින්ද සිල්වා යළි සිර භාරයට ගන්නා ලෙසද අධිකරණය නියෝග කළ බැවින් ජුනි 01 වැනිදා අපරාධ පරීක්ෂණ දෙපාර්තමේන්තුව විසින් දුමින්ද සිල්වා අත්අඩංගුවට ගනු ලැබීය.