යටත්විජිත පාලන සමයේදී ඉංග්‍රීසීන් විසින් අංගම්පොර සටන් කලාවට පැනවූ තහනම ඉවත් කිරීමේ ගැසට් නිවේදනයක් නිකුත් කිරීමට කැබිනට් මණ්ඩලයේ අනුමැතිය හිමිව තිබේ.
ඒ ක්‍රීඩා හා යෞවන කටයුතු අමාත්‍ය රොෂාන් රණසිංහ මහතා විසින් ඉදිරිපත් කළ යෝජනාවකට අනුවය.
අමාත්‍ය මණ්ඩල ලේකම් කාර්යාලය ඒ සම්බන්ධයෙන් නිකුත් කළ නිවේදනය මෙසේය.
- මෙරට පවතින සාම්ප්‍රදායික ක්‍රීඩාවක්, සටන් කලාවක් මෙන්ම සංස්කෘතික උරුමයක් වශයෙන් වැදගත් වන අංගම් සටන් කලාව ප්‍රවර්ධනය කිරීම සඳහා ක්‍රීඩා හා යෞවන කටයුතු අමාත්‍යාංශය විසින් පියවර ගනු ලැබ ඇත.
අංගම්පොර සටන් ශිල්පය සඳහා පනවා ඇති තහනම ඉවත් කිරීම පිණිස 2019 වර්ෂයේදී අමාත්‍ය මණ්ඩල අනුමැතිය ලබා දී ඇති නමුත්, ඒ සඳහා වන ගැසට් නිවේදනය මෙතෙක් ප්‍රකාශයට පත් කර නොමැත.
එබැවින්, අංගම්පොර සටන් කලාව සංරක්ෂණය කර ප්‍රවර්ධනය කිරීමේ අරමුණින්, ඉංග්‍රීසි යටත් විජිත පාලකයින් විසින් පනවා ඇති තහනම ඉවත් කිරීම ගැසට් නිවේදනයක් මඟින් ප්‍රකාශයට පත් කිරීම පිණිස ක්‍රීඩා හා යෞවන කටයුතු අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.