ලබන වසර සඳහා පාසල්වල පළමුවන ශ්‍රේණියට ළමුන් ඇතුළත් කිරීමේ චක්‍රෙල්ඛය සංශෝධනය වනු ඇත.
ඒ සඳහා ඊයේ රැස්වූ කැබිනට් මණ්ඩලයේ අනුමැතියද හිමිව තිබේ.
අමාත්‍ය මණ්ඩල කාර්යාලය විසින් ඒ සම්බන්ධයෙන් නිකුත් කර ඇති නිවේදනය මෙසේය.
පාසල්වල පළමුවන ශ්‍රේණියට ළමුන් ඇතුළත් කිරීම සඳහා මීට පෙර නිකුත් කරන ලද චක්‍රලේඛයන් ක්‍රියාත්මක කිරීමේදී පැනනැඟුන ගැටලු පිළිබඳව විදුහල්පතිවරුන්, චක්‍රලේඛ සංශෝධන කමිටුව, අමාත්‍යාංශයේ විමර්ශන අංශය, අල්ලස් හෝ දූෂණ චෝදනා විමර්ශන කොමිෂන් සභාව හා මැතිවරණ කොමිෂන් සභාව ඇතුළු විවිධ පාර්ශ්ව විසින් ඉදිරිපත් කරන ලද කරුණු මෙන්ම ඒ පිළිබඳව වූ අධිකරණ තීන්දු ද සැලකිල්ලට ගනිමින්, සංශෝධිත නව චක්‍රලේඛයක් අධ්‍යාපන අමාත්‍යාංශය විසින් පිළියෙල කරනු ලැබ ඇත.
ඒ අනුව, 2023 වර්ෂයේ සිට ඉදිරියට පාසල්වල පළමුවන ශ්‍රේණියට ළමුන් ඇතුළත් කිරීම සඳහා එකී සංශෝධිත චක්‍රලේඛයේ සඳහන් විධිවිධාන අදාළ කර ගැනීම පිණිස අධ්‍යාපන අමාත්‍යතුමා ඉදිරිපත් කරන ලද යෝජනාව සම්බන්ධයෙන් අමාත්‍ය මණ්ඩලයේ එකඟතාව ලබා දෙන ලදී.