දක්ෂිණ අධිවේගී මාර්ගයේ ධාවනය වෙමින් තිබුණු මෝටර් රථයක ජනේල් විවරකරගෙන සිය සිරුරු වාහනයෙන් පිටතට දමාගෙන ගමන් කළ පුද්ගලයින් සියළු දෙනාම හදුනාගත් බව පොලිස් මාධ්‍ය ප්‍රකාශක නියෝජ්‍ය පොලිස්පති නීතීඥ අජිත් රෝහන මහතා සදහන් කළේය.
එම පුද්ගලයින්ට අද(12) දින දක්ෂිණ අධිවේගී මාර්ගයේ ගැලනිගම පොලිස් මුරපොල වෙත පැමිණෙන ලෙස දැනුම්දීමක් කර තිබුණත් ඒ අය පැමිණ නැත. ඒ වෙනුවට මෝටර් රථයේ ලියාපදිංචි හිමිකරුත් එහි වත්මන් හිමිකරුගේ පුතෙක් සහ අදාල සිදුවීම වන විට එම මෝටර් රථය පදවන ලද රියදුරාත් පැමිණ ඇතැයි අජිත් රෝහන මහතා පැවසීය. වත්මන් හිමිකරු මෝටර් රථය මුල් ලියාපදිංචි හිමිකරුගෙන් මිලදී ගෙන ඇතත් වත්මන් හිමිකරුගේ සිය තොරතුරු මෝටර් රථ ලියාපදිංචි කිරීමේ කාර්යාලයට ලබාදී නැතැයි ද අජිත් රෝහන මහතා සදහන් කළේය.
වත්මන් හිමිකරු ශල්‍ය කර්මයකට ලක්කර සිටින බව ඔහුගේ පුතා සදහන් කර ඇත. දක්ෂිණ අධිවේගී මාර්ගයේ අපරික්ෂාකාරීව පදවන ලද මෝටර් රථයද ගැලනිගම පොලිස් මුරපොල වෙත රැගෙන විත් ඔහු ඉදිරිපත්කර තිබේ.
ඉකුත් සෙනසුරාදා මහනුවර සිට කඩවතට පැමිණ කඩවතින් අධිවේගීමාර්ගයට පිවිස ගාල්ල බලා ගොස් නැවත අධිවේගී මාර්ගයේම කඩවතට පැමිණ මහනුවරට ගිය බව මෝටර් රථයේ රියදුරා පවසා ඇත.
අපරික්ෂාකාරීව රිය ධාවනය කිරීම සම්බන්ධයෙන් රථවාහන පනතින් ද අනාරක්ෂිතව වාහනයෙන් පිටතතට සිරුර දමාගෙන යමින් සෙසු වාහන අනතුරකට පත්කිරීමේ අවධානමකට ලක්කිරීම සම්බන්ධයෙන් අපරාධමය නීතිය යටතේත් නීතිමය පියවර ගන්නා බව අජිත් රෝහන මහතා වැඩිදුරටත් සදහන් කළේය. ඒ අනුව මෝටර් රථයේ රියදුරුට එරෙහිව මුලිින්ම නීතිය ක්‍රියාත්මක කර තිබේ.