ආසියානු කලාපයේ ජපානයට පසුව වේගයෙන්ම වයස්ගත ජනගහනයක් සිටින රට ශ්‍රී ලංකාව බව රාථමික සෞඛ්‍ය සේවා, වසංගත රෝග හා කොවිඩ් රෝග පාලන කටයුතු රාජ්‍ය ඇමතිනී සුදර්ශනී ප්‍රනාන්දුපුල්ලේ මහත්මිය පවසයි.

ඇය පවසන්නේ මේ වනවිට මෙරට තුළ අවුරුදු 60ට වැඩි 17%ක වැඩිහිටි ජනගහනයක් සිටින බවය.

ඇය මේ බව අනාවරණය කළේ අද පාර්ලිමේන්තුවේදීය.

ජාතික වැඩිහිටි කවුන්සිලයේ සාමාජික මහාචාර්ය ලක්ෂ්මන් දිසානායක මහතා විසින් මෙරට තුළ වැඩිහිටියන් මිලියන 3.8ක් පමණ සිටින බව ඔහු පුරෝකථනය කර තිබේ.

2025 වනවිට 20% දක්වා වැඩිවේ යැයි අපේක්ෂා කරන බව පවසන රාජ්‍ය අමාත්‍යවරිය කියාසිටියේ ඊට පෙර මෙරට තුළ ජනගහනයේ වැඩිවිමක් අපේක්ෂා කරන බව ය.

මෙරට තුළ ආයු අපේක්ෂාව පිරිමි පුද්ගලයන්ගේ අවුරුදු 72-73ක් කාන්තාවන් අවුරුදු 79 ක් ලෙස 2012 සමීක්ෂණයෙන් තහවුරු වී තිබේ.

විශ්‍රාම වයස අවුරුදු 65 බවට අයවැයෙන් තීරණය කිරීම පිළිබඳවද ඇය මෙහිදී ප්‍රශංසා කළාය.

අවුරුදු 60-69 වයස්වල අය තරුණ වැඩිහිටියන් ලෙස ද අවුරුදු 70-79 වැඩිහිටි ජනගහනය සහ අවුරුදු 80ට වැඩි අය වයෝවෘද්ධ අය ලෙස හඳුන්වන බව ද ඇය අවධාරණය කළාය.