මහමාර්ගයේ අනාරක්ෂිත ලෙස රථවාහන හසුරුවන්නන්ගේ නිවසටම දඩ පත්‍රිකාවක් යැවීමේ ක්‍රියාදාමය නුදුරේදීම මෙරටදී ආරම්භ කරන බව මහජන ආරක්ෂක අමාත්‍යාංශය පවසයි.
ඒ අනුව කොළඹ නගරය ආවරණය වන පරිදි මංසන්ධි 33 ක් නිරීක්ෂණය වන සමීප රූප ආවේක්ෂණ කොට්ඨාශය පසුගියදා මහජන ආරක්ෂක අමාත්‍යවරයාගේ නිරීක්ෂණයට ලක්ව තිබේ.
එහිදී මේ සම්බන්ධයෙන් අවධානය යොමුව ඇතැයි සඳහන් වේ.
ජනතාව හා දේපළවල ආරක්ෂාව ප්‍රධාන තේමාව කරගත් මෙම කොට්ඨාශය මගින් අපරාධයක් සිදු වීමට ඇති හැකියාව නැති කිරීම, අපරාධයක් නිරීක්ෂණය කර පියවර ගැනීම, අපරාධයක විමර්ෂණ කටයුතු සඳහා සහභාගි වීම වැනි කාර්යයන් සිදුකරනු ඇති.
මෝටර් රථ ප්‍රවාහන දෙපාර්තමේන්තුව සහ නීතිපති දෙපාර්තමේන්තුව සමග එක්වී අදාල වැරදිකරුවන්ගේ නිවසටම දඩ පත්‍රිකාවක් යැවීමේ ක්‍රියාදාමය නුදුරේදීම සිදු කිරීමට නියමිත බව නිවේදනයක් නිකුත් කරමින් මහජන ආරක්ෂක අමාත්‍යාංශය පෙන්වා දෙයි.