අංජනා මල්ලවආරච්චි
කලාපීය ජාත්‍යන්තර ගුවන් සේවා ආරම්භ කිරීම ඉලක්ක කොටගනිමින් යාපනය පලාලි ගුවන්තොටුපල සංවර්ධනය කිරීමට රජය තීරණය කර තිබේ.
කලාපීය ගුවන් සේවා ආරම්භ කිරීම යටතේ කොවිඩ් වසංගතය හමුවේ තාවකාලිකව ඇණහිට ඇති චෙන්නයි සහ යාපනය අතර ගුවන් සේවා ඉදිරි මාස කිහිපය තුළ නැවත ආරම්භ කිරීමට ද අපේක්ෂා කරන බව සංචාරක අමාත්‍යංශය කියයි.
මාලදිවයින සහ දකුණු ඉන්දියානු ගමනාන්තයන් සම්බන්ධ කරගනිමින් නව ගුවන් සේවා ආරම්භ කිරීමට අපේක්ෂා කරන බවත් ගුවන් සමාගම් රැසක් දැනටමත් ශ්‍රී ලංකාව සමග කලාපීය ගුවන් වාර ආරම්භ කිරීමට සාකච්ඡා කොට ඇති බවත් සංචාරක ඇමති ප්‍රසන්න රණතුංග මහතා සඳහන් කරයි.
යාපනයේ පලාලි ගුවන් තොටුපොළ සංවර්ධනය කිරීමේ වැඩසටහනට අනුව දැනට ගුවන්තොටුපළේ පවතින අඩුපාඩු හඳුනාගෙන අදියර තුනක් යටතේ එම ගුවන් තොටුපොල සංවර්ධනය කිරීමට නියමිත බවද ඇමැතිවරයා කියයි.
